SERIAN: Menteri Pemansang Infrastruktur enggau Penyambung Dato Sri Michael Manyin Jawong ngelalau bala ketuai bansa Bidayuh di Pelilih Serian nyukung sapa aja chalun ke dipilih ngarika Barisan Nasional (BN) ba sitak baru Bukit Semuja.
Ku iya, sida patut bebasaka pemutus Kepala Menteri ke nyadi Chairman BN Nengeri, Datuk Patinggi Tan Sri Adenan Satem sentang chalun Bukit Semuja ke udah ditetap ba penuduk ungkup Bidayuh.
“Chalun BN ba penuduk nya sigi Bidayuh, ketegal Kepala Menteri udah suah madah penuduk nya ungkup Bidayuh.
“Sapa aja chalun ke dipilih ila, undi mih iya ketegal nya mega undi ungkup BN,”ku iya.
Manyin mansutka jaku nya ba Pengerami Gelumu Ketuai Bansa Pelilih Serian, ketuai genturung pendiau enggau Komiti Pemansang enggau Pengelikun Genturung Pendiau (JKKK) di Balai Tayung Langui, Kpg Pichin malam ensanus.
Bukit Semuja ditumbuh asil pechah sekeda kandang endur dalam Tebedu enggau Kedup lalu nyadi seiti penuduk baru ari 11 ti deka dikerebut ba pengawa bepilih nengeri tu ila.
Bukit Semuja mega nyadi sitak bepilih baru ungkup Pelilih (Baru) Serian ke ngembuan 13,000 iku pengundi iya nya 48 peratus Bidayuh, 21 peratus China, 19 peratus Melayu enggau 12 peratus Iban.
Adenan, rambau pengawa ketuai begulai enggau rayat di Kpg Rasau kena 20 Mac tu tadi bisi madah dia chalun terus BN deka disabung ba Bukit Semuja.
Ngenang kaul ke sama, Manyin minta penyukung BN di Serian anang kelalu ngambi mudah semua pekara taja pan sigi ditemu BN deka menang lalu numbuhka perintah ketegal populariti Adenan.
“BN sigi menang ba pengawa bepilih lalu Datuk Patinggi Adenan sekali agi deka nyadi Kepala Menteri.
“Tang anang mih mikir ketegal BN menang, kita ngundi penyakal ketegal ti siru. Tu tau mai penusah.
“Taja pan penyakal deka menang ba sekeda penuduk dalam kandang mengeri, nadai besai pangka ari pekara nya ke alai BN sigi deka numbuhka perintah,’ku iya ke mega ADUN Tebedu.
Ba pengerami nya, Manyin enggau ADUN Kedup, Martin Ben bela ngagihka RM30,000 enggau RM20,000 ngagai Gerempung Ketuai Bansa Bidayuh Serian.
Bela datai Sekretari Politik (Kepala menteri) John David Nyauh, Residen Serian Dahim Nadot enggau Temenggung Pelilih Menua Serian Henry Bujang Sadok.-Borneo Post
Post a Comment