KUCHING: Barisan Nasional (BN) Sarawak naka kemari udah ngerintai urung 70 nama chalun parti nya ke deka bediri ngetanka kerusi BN maya Pengawa Bepilih Kunsil Nengeri ke-11 (PRN ke-11) ti deka diatur enda lama agi.
Kepala Menteri Datuk Patinggi Tan Sri Adenan Satem di aum media kemari, ngerintaika lapan iti kerusi/sitak ke penudi endar dipadahka iya dalam rintai Parti Pesaka Bumiputera Bersatu (PBB).
“Ari lapan chalun nya, enam iku orang baru iya nya, Dato Idris Buang, 62 (Muara Tuang), Awla Dris, 54 (Simunjan), Shafiee Ahmad, 46 (Daro), Datuk Dr. Juanda Jaya, 44 (Jemoreng), Mohd Chee Kadir, 63 (Kabong – kerusi baru), Jefferson Jamit anak Unyat, 58 (Bukit Goram – kerusi baru)”ku iya.
Ari nama chalun ti di rintaika nya, Juanda nyilih Abu Seman Jahwie ke nyadi Kaban Kunsil Nengeri (ADUN) Jemoreng lalu Shafiee nganti Dr. Murni Suhaili.
Ba aum media nya mega, Adenan ngerintaika tiga iku Chalun Terus BN, iya nya Miro anak Simuh, 40 (Serembu – Kerusi Baru), John anak Ilus, 52 (Bukit Semuja – Kerusi Baru), Dato Gerawat Jala, 59 (Mulu – Kerusi Baru).
Ungkup kerusi Kalaka enggau Katibas, agi ditanka Datuk Abdul Wahab Aziz, 68 enggau Datuk Ambrose Blikau, 62 ke alai kededua seduai sama ari PBB.
Naka ke diatu, semua chalun BN udah dipadah Kepala Menteri,semina sekeda kerusi ari parti komponen BN, iya nya Parti Demokratik Progresif Sarawak (SPDP) enggau Parti Sa’ati Rayat Sarawak (SUPP) ke agi bedau dirintai iya magang.
Kelimpah ari nya, parti ke ngumbai diri bekaling enggau BN, Parti TERAS enggau UPP, semina sekeda nama aja udah ditetapka ulih Adenan agi ngetanka kerusi sida iya naka tu, iya nya ari UPP, chalun keterubah endar ditetapka iya nyadi chalun terus BN, iya nya Datuk Dr. Jerip Susil ke udah tiga penggal ngetan kerusi Bengoh deka bediri di sitak ke sama tang diberi nama baru, Mambong, lalu penyandang ke sitak Engkilili, Dr Johnical Rayong ke ditetapka Adenan ujung minggu nyin tadi di atur pengawa Sejiwa Senada di Sri Aman.
Ari sepiak TERAS, ke udah ditetapka nyadi chalun terus BN, iya nya Rosey Yunus (Bekenu) enggau Paulus Palu Ngumbang (Batu Danau).
Ba aum media nya mega, Adenan ditanya sekalika chalun sitak Bukit Saban, Spaoh, Betong Datuk Amar Douglas Uggah deka ditchiri nyadi Sapit Kepala Menteri enti sema iya menang ila, ku Adenan: “Enti iya udah dipilih nyadi chalun Bukit Saban, iya deka badu mangku pengawa nyadi Menteri Industri Kebun Bedandang Besai enggau Komoditi ba renggat Perintah Besai.
“Ba sentang pangku pengawa nyadi sapit kepala menteri, nya nitihka pemutus aku,” ku Adenan madah munyi nya ba aum media ngerintaika nama chalun BN-PBB enggau chalun terus BN di Opis Kepala Menteri di Wisma Bapa Malaysia, kemari.
Sama bisi enggau ngulu aum media nya kemari, Chairman Kelab Barisan Nasional Backbenchers (BNBBC) ti mega nyadi chalun ke Semop, Abdullah Saidol, Sekretari Besai BN Menua Sarawak ti mega nyadi chalun Kemena Datuk Dr Stephen Rundi enggau chalun Gedong, Datuk Naroden Majais.-Borneo Post
Post a Comment