KUCHING: Pengurang ari sukut belanja entara sekeda kebuah ex-presiden Parti Pekerja Sarawak (SWP) Larry Sng nyurutka diri ari minta pilih ba Pengawa Nengeri Ke-11 (PRN 11) di N.63 Bukit Goram.
Ku Larry nengah pemadah dipansut ba Facebook kemari, Parti Pesaka Bumiputera Bersatu (PBB) deka bebendar ngulihka pemujur di Bukit Goram nyengkaum ngeluarka belanja besai ngambi juluk nya dijapai.
“Ngambika kitai ulih berunding enggau mudah sentang pekara tu, Bukit Goram ukai penuduk ke mudah diempu PBB.
“Aku bisi peluang besai menang di Bukit Goram tang berapa penyampau belanja ke deka dikena aku teulihka pemujur nya.
“Bajet aku ungkup pengawa bepilih deka nambah tiga kali lipat lalu penyampau nya mengkang kurang enti dibanding enggau BN,” ku Larry.
Larry pechaya, BN deka ngeluarka belanja urung RM15 juta di Bukit Goram iya nya urung RM200,000 ungkup sebuah rumah panjai 20 pintu.
Serak tu, PBB nyabung chalun baru di N.63 Bukit Goram iya nya Jefferson Amit.
Ngenang kaul ke sama, Larry ke kala nyadi pengari rayat ba sitak Pelagus pengelama dua renggat berengkah 2001 nyentuk 2011 mega madahka pengawa bepilih ungkup Bukit Goram tebal agi(80 peratus) ngaul peranak rumah panjai enti dibanding enggau sida ke di pasar Kapit.
Berindik enggau nya, Larry pechaya enti iya majakka pengeran minta pilih, pekara nya tau endar ngujungka iya nanggung utang ke besai dalam timpuh lima taun ke deka datai, lalu pedis iya deka nyendia servis ungkup rayat.
“Aku enggai semina dikangau orang YB, aku deka ngereja pengawa ungkup komuniti ke alai aku mega pechaya bisi sekeda orang ke ngempu kuasa ti besai enggai meda pekara nya nyadi.
“Nengah pemutus nyurutka diri ari Bukit Goram, aku udah ngelepas awak manah nya ke alai mayuh orang berasai enda lantang nyengkaum aku empu.
“Aku udah bejalai ngaul rayat di Bukit Goram kenyau 2013. Nyurutka diri seminggu sebedau hari ngantung nama seiti pemutus ke mar digaga,” ku iya.
Kelimpah ari nyurut diri ari minta pilih, Larry mega udah ngelengkaka penuduk nyadi presiden SWP.-Borneo Post
Post a Comment