MUKAH: Juluk perintah deka nempa mengeri Mukah nyadi ‘Smart City’ ulih dijapai enti sema rayat bela sepenemu sereta nyukung polisi-polisi perintah.
Penyandang Kunsil Nengeri (DUN) Satok Datuk Amar Abang Johari Tun Openg, madahka maya Tun Pehin Taib Mahmud megai Samarahan, iya mujur nempa Samarahan nyadi sebengkah ‘Bandar Ilmu’ sereta ngemujurka juluk ke sebaka ungkup mengeri Mukah.
Ku iya, juluk tu deka terus dipejalaika ari baruh iring Kepala Menteri Datuk Patinggi Tan Sri (Dr) Adenan Satem nengah pengawa bejalaika polisi Transformasyen Menua Pesisir (RTP).
“Nya alai kitai ngembuan polisi ke numpu ngagai agih belanja ke besai ungkup pemansang di kandang menua pesisir.
“Kitai ngemansangka kandang menua ke besai tu (Mukah) nyengkaum pengawa betanam betupi sereta dalam pemansang tu meseti bisi palan mengeri sereta servis baka kedai-kedai ke ulih nyadi palan pemekal utai ke diguna rayat di mengeri nyengkaum di genturung rumah.
“Kedua iya, kitai numbuhka palan pelajar dikena ngadaka raban komuniti ke bepelajar tinggi.
“Nya alai bungkur pemansang ke dipejalaika kitai chukup besai ba sukut pemansang mengeri,” ku iya maya bejaku bejadika Pengerami Nasih Tanah Projek Mukah Ria ditu kemari.
Sama bisi datai ngulu pengawa tu Ketuai Pemesai Eksekutif Green Summit Development Sdn Bhd, Kaunsilor James Hii Sing Lung, Sekretari Mendam Menteri Pengawa Berumah Dr Wan Liz Osman Wan Omar, Chairman Syarikat Kumpulan Hotel Kingwood Datuk Hii King Chiong, chalun BN di DUN Telian Yussibnosh Balo sereta chalun BN di DUN Balingan Abdul Yakub Arbi.
Nya alai, Johari ngarapka kaul kerejasama rat entara perintah enggau rayat ulih ditanggam dikena nyapai juluk enggau polisi perintah nya.
“Perintah udah bisi polisi ke manah ungkup rayat lalu rayat meseti begulai enggau perintah ngemujurka polisi tu.
“Reti iya, lebuh rayat enggau perintah seati, nadai penimpang dalam kitai ngemansangka nengeri tu,” ku iya.
Pia mega, dikena nentuka pemaik entara rayat enggau perintah, ku iya, perintah patut mega mendingka peminta ari rayat.
“Enti perintah enda mendingka peminta rayat, ngujungka polisi nya nadai sebarang reti tauka sengapa.
“Tang perintah nengeri kitai, baruh iring Tun Pehin Taib (TYT) enggau Kepala Menteri (Datuk Patinggi Tan Sri Adenan Satem) endang, seruran mendingka peminta rayat,” ku iya nampung seraya nambah bemacham peminta rayat udah diturut, sekeda ari nya baka pengawa nyukat kelingi tanah Adat Bansa Asal (NCR) enggau ngurangka pupu pintu enggau tanah.-Borneo Post
Post a Comment