KUCHING: Parti Tenaga Rakyat Sarawak (TERAS) besedia nitihka pinta sereta atur Kepala Menteri Datuk Patinggi Tan Sri Adenan Satem enti deka bediri atas tiket Barisan Nasional (BN) nyadi chalun terus, maya Pengawa Bepilih Kunsil Nengeri ke-11 (PRN ke-11) enda lama agi, iya nya enda tau enda ningkilka diri ari parti alai sida ke diatu.
Presiden TERAS, Tan Sri William Mawan Ikom madah, parti nya nadai pilih bukai kelimpah ari ningkilka dirika TERAS enti agi deka dalam Tim Adenan.
“Enti diasuh baka nya, kami pan deka nitih atur nya enti deka bediri dalam PRN ke-11 lalu agi mengkang dalam BN.
“Kami pan enda tau enda nitihka atur ke udah ditetap…Nadai pilih bukai,” ku iya madah lebuh dikerandau pengudah bejadika atur pengawa Nyuaka Geran Gerempung sereta Serakup Nembiak, Lumba enggau Main Sarawak 2016 di Auditorium Yayasan Sarawak, kemari.
Lebuh ditanya pasal berita selebubu ti madahka anak lelaki iya, Jackson Mawan enda dichalunka ba kerusi Pakan tang kerusi nya mengkang ditanka Mawan , iya madah, parti bisi rintai nama ke udah dianjung ngagai Chairman BN Nengeri tu.
Taja pia, iya madah enggai mantaika rintai nama ke dianjung iya ngagai Adenan, seraya ngelempaika pekara nya ba Kepala Menteri.
Mawan ti mega Kaban Parlimen Saratok madah, taja pia iya sedia ngetanka kerusi Pakan enti diasuh ketuai BN nengeri.
“Aku kala madahka diri sedia nerima pinta tauka diasuh ketuai BN, tang naka ke diatu lalu bedau temu.
“Aku nadai madahka diri enggau bepilih ba DUN, laban aku agi nganti apemutus ari ketuai….Enti Ketuai BN nengeri tu mutus milih nama aku nyadi chalun, aku sedia ngetan kerusi nya ke BN,” ku iya.
Kelimpah ari Mawan, Sapit Presiden TERAS Datuk Peter Nansian Ngusie ke nyadi penyandang kerusi Tasik Biru, Sekretari Besai Datuk Sylvester Entri Muran (Marudi), Tukang Wang Paulus Palu Gumbang (Batu Danau) enggau Mandal Presiden Kanan Rosey Yunus (Bekenu).
Naka ke diatu, semina Rosey enggau Paulus udah ditetapka Adenan bediri nengah tikit BN.
Ba pengawa PRN 2011, Mawan maya nya ke agi nyadi Presiden Parti Demokratik Progresif Sarawak (SPDP) menang di Pakan enggau majoriti 1,197 ngalahka chalun Parti Kebangsaan Sarawak (SNAP) Jamal Abdullah @ Tedong Gunda ke semina bulih 2,741 undi.
Iya, enggau empat iku pengari rayat bukai madahka diri empu pansut ari SPDP kena 15 Mei 2014 ketegal penyarut dalam partii sebedau numbuhka TERAS.-Borneo Post
Post a Comment