Penerang ngumbai GST ngenusah rayat, isu bukai ke bejai perintah di media rama enda ibuh dipechaya
KAPIT: Penerang ke ngumbai GST (chukai barang enggau servis) tu ngenusah rayat sereta bemacham isu bukai ke ayan dikena bejai perintah ba media rama tau enda ibuh dipechaya, ku Menteri Pemansang Tanah, Tan Sri Datuk Amar Dr James Jemut Masing.
Iya madah rayat mayuh beserekang penemu berindik ari pekara tu dipetalatka raban ari parti penyakal.
Iya madah munyi nya rambau bejadika Pengerami Ketuai Begulai enggau Rayat ba Rumah Assun, Lepong Mujong, apin lama ke udah.
“GST enda ulih dikeengai laban pekara nya kebatang ukai dikena ngenusah rayat tang kebendar iya meri pemanah dikena nambahka penatai pemisi menua.
“Ambika chunto, menua Greece iya nya di Eropah udah dikenukuka bankrap ketegal perintah sida iya enda nemu ngatur belanja ari GST.
“Reti nya, ba pengawa dagang, makin mayuh barang dibeli nyadi mayuh agi chukai dibayar penguna lalu asil nya ulih dikena ngatur pemansang,” ku iya.
Masing madahka enda semua rayat ba menua kitai tu mayar chukai. Semina 10 peratus aja ke mayar lalu ke bukai nya semina makai asil iya aja.
“Nya alai, iya ngelalau anang enggai mayar chukai ba maya ke patut.
“GST tu salah ba mata rayat berindik ari barang ke dibayar nya tadi bisi nambah rega mimit tang perintah nemu ngatur iya laban enda semua barang pemakai tu dichaj GST. Tepung, minyak makai, garam, gula tauka barang pemakai ke semampai diguna kitai tiap hari nadai chaj GST,” ku iya.
Iya mega madahka mensia mayuh anang mudah kena pelitik bala pedagang ke deka ngambi ulih.
“Perati ke dulu resit ke udah dikeluarka sida lalu peda lumur rejista GST sida sida dikena nentuka kedai nya amt ulih ngambi GST tauka enda.
“Anang sesekali dikemelika parti penyakal ba pekara tu. Parti penyakal nya,enti ulih anang ngasuh sida niki rumah kita lalu ngajum kita.
“Sida (penyakal) semina deka nyengguk kita sebedau hari muai undi, tang udah ngundi tu mua sida iya sigi nadai dipeda agi. Diak kita meseti berunding ni bagi pengari rayat kita ke ulih meri pemansang dudi hari ila ukai semina penyenang tekala nya aja,” ku Masing nambah.
Lebuh ditanya pengarang berita, bekaul enggau pemutus Larry Sng ningkilka penuduk diri nyadi presiden SWP (Sarawak Workers Party) Masing madahka nya sebengkah pemutus ke betul.
Iya madah, Larry agi biak lalu enda ibuh ngelaban perintah dikena neruska pejalai politik iya.
Masing mega arapka chalun BN di DUN N63 Bukit Goram, Jefferson Jamit ulih menang maya PRN ke 11 tu ila.
Sama bisi datai Kaban Parlimen Hulu Rajang P216, Datuk Wilson Ugak Kumbong, Pemesai Pelilih Bukit Mabong, Douglas Pungga, bala kaunsilor, penghulu, tuai rumah sereta ke bukai.-Borneo Post
Post a Comment