KUCHING: Chairman Parti Tindakan Demokratik (Sarawak) Chong Chieng Jen kemari nganjung surat minta Kepala Menteri nginsil tagang, enda ngemendar ketuai politik ari penyakal tama ke Sarawak.
Bejaku ba seiti aum pengarang berita, iya madahka raban ketuai nya semina deka ngadu kereja politik di nengeri tu lalu ukai ngereja pengawa ke bekaul pekara rasis tauka raban orang ektrimis ba jalai pengarap.
“Entara sekeda ketuai ari parti penyakal ke ditagang tama iya nya Tony Pua, Teresa Kok, Teo Nie Ching, Nurul Izzah, Tian Chua, Rafizi enggau Mat Sabu.
“Nadai seiku ari raban tu kala ngereja pengawa besiping ba raban bansa tauka ektrimis ba jalai pengarap.
“Nyengala dipeda, atur nagang sida tu tama tebal agi ungkup pemaik Barisan Nasional (BN) Sarawak ti deka napi Pengawa Bepilih Besai Nengeri ke-11 (PRN11),’ku iya.
Chong ke mega MP Bandar Kuching sereta penyandang sitak DUN Kota Sentosa nambah, udah dituku ba Akta Imigresyen nengah Seksyen 66 enggau 67 dia peranak ari nengeri bukai dikemendar tama ke nengeri tu enti pekara nya bekaul enggau pengawa politik.
“Pengawa ke deka dikereja sida ditu sebengkah pengawa politik ke sah dalam undangundang lalu atur Perintah Nengeri nagang nya enda nitihka undang-undang,”ku Chong.
Naka ke diatu ku Chong, lebih 20 ketuai ari DAP udah ditagang tama ke nengeri tu.
Berindik enggau nya, iya ngasai Kepala Menteri Datuk Patinggi Tan Sri Adenan Satem udah enda nguna kuasa nitihka pematut sereta sengapa ngeluarka tagang.
Pemantu (Khas) Chong, Abdul Aziz Isa nganjung surat nya ngagai Opis Kepala Menteri kemari.-The Borneo Post
Post a Comment