SEBUYAU: Rayat dilalau enda mudah tekuing runding enggau penemu parti ti datai lima setaun sekali ke lebih agi parti ari Semenanjung.
Menteri Muda Pemansang Menua Pesisir, Datuk Julaihi Narawi madahka rayat ke lebih agi ti diau di menua pesisir anang beginsit sukung ari perintah Barisan Nasional (BN) ngambika ulih terus ngasaika pemansang.
“Maya PRN nyau deka diatur mayuh mua orang ti enda dikelala ke datai lima taun sekali mai semaya bula,nya alai anang mudah tekuing tauka tekeruga runding laban sida.
“Ke patut maya PRN beri sukung penuh ngagai Kepala Menteri (Datuk Patinggi Tan Sri Adenan Satem) enggau tim iya ngambika ulih menang ba semua 82 sitak Kunsil Nengeri (DUN) ti diperebutka.
“Penyulut nya ulih ngemuntangka agi pengawa Kepala Menteri enggau tim iya berunding enggau perintah besai pasal ungkup belanja enggau meri kuasa pulai baru ngagai nengeri tu, kelimpah ari ulih mekuh ngagai pemansang menua pesisir, enti enda kitai rugi jemah ila.
“BN ngembuan perambu ti nyengenda sereta ulih bejalaika perambu nyengkaum meri Lisin Pendudukan Sementara (TOL),” ku Kaban Kunsil Nengeri (ADUN) Sebuyau nya.
Julaihi ti Menteri Muda Industri (Beranakka Puku enggau Promosyen ) mansutka penemu nya lebuh bejaku ba ‘Majlis Penyampaian Surat Tawaran Lesen Pendudukan Sementara (TOL) Bagi Skim Pembesaran Kpg (SPK) Sebangan dan Skim Pembesaran Kpg Tungkah Melayu’ ti diatur ba Dewan Kpg Sampat, Sebangan ditu kemari.
Pengerami nya udah mujur dipenyadi Menteri Pengatur Pemansang Pengeraja Asal enggau Rampa Menua II Datuk Amar awang Tengah Ali Hasan, ti lalu nyuaka surat tawaran TOL ngagai 56 iku penerima SPK Sebangan enggau 36 iku penerima SPK Kpg Tungkah Melayu.
Awang Tengah lebuh bejaku ba pengerami nya ngelalau peranak ti nerima Surat Tawaran TOL nya nguna tanah lot nya enggau manah.
Iya ngarapka orang mayuh ke lebih agi peranak ti nerima surat TOL nyengkaum peranak dalam DUN Sebuyau terus nyukung perintah BN ngambika atur pengawa nya ulih terus chakah dipejalaika.
“Kitai minta penerima Surat Tawaran TOL tu enda nyual tauka nyerahka tanah tu ngagai orang bukai,” ku iya.
“SPK ditumbuhka ukai semina dikena napi peminta guna pemayuh tubuh ti majak nambah tang kitai mega deka nyendiaka endur diau bisi atur lalu meri pengelantang ngagai peranak nya empu kelimpah ari disediaka perengka guna mensia mayuh baka jalai alun, bekal ai, bekal elekterik enggau ke bukai,” ku iya seraya madahka nya entara pemansang ti dibai perintah BN.
Kelimpah ari nya Awang Tengah ngansak rayat nyengkaum peranak dalam DUN Sebuyau terus bekerejasama enggau perintah ngambika pemansang di menua pesisir ulih dipejalaika.
Nitihku iya, dalam sitak Sebuyau aja ari taun 2009 nyrntuk 2016, perintah udah ngungkupka belanja nyauka manggai RM33 juta dikena bejalaika projek bekal elekterik menua pesisir (BELB).
“Tebal agi projek nya udah tembu semina dua endur agi iya nya Kpg Tungkah Melayu enggau Kpg Klait Sebuyau ti benung dipejalaika urung 70 peratus nyentuk 80 peratus,” ku iya.
Lalu ba sentang bekal ai menua pesisir (BALB) di sitak Sebuyau, perintah udah ngemendarka lebih RM30 juta dikena ngemanahka loji ai di Sebangan lalu perambu dalam timpuh panjai dipelabaka bekal ai disambung terus ari Kuching, ku iya.-BORNEPO POST
Post a Comment