KUCHING: Menteri Kereja Raya Dato Sri Fadillah Yusuf enggau nyemetak nesau bala kunteriktor ke bulih kunterik ari perintah anang meri sab kuntrek nya ngagai orang bukai.
“Enti bulih kunterik ari perintah, gaga kediri empu lalu anang sesekali meri sab ngagai orang bukai. Opis menteri deka matau pekara tu.
“Barang sapa ditemu meri sab ngagai orang bukai, sida deka diseliah nerima kunterik bukai jemah,’ku iya rambau nyadi saksi pengawa enchabut undi kunterik ngintu pemanah jalai alun ke dikuasa Perintah Besai 2016, di Indu Opis JKR ditu, kemari.
Pengawa chabut undi nya ungkup raban kunteriktor mit bumiputera kelas G1 ke ngerijista diri ba CIDB sereta ngembuan pengelandik ba bengkah pengawa ngaga jalai (CE01) enggau kereja Civil Engineering (CE21).
Tiga puluh kunterik ngintu pemaik jalai ke beungkus RM1.5 juta dikerebut 104 kunteriktor kelas G1 ungkup Pelilih Kuching.
Ngenang sentang pengawa kemari, Fadillah madah atur enchabut undi nya meri awak ngagai kunteriktor bumiputera kelas G1 bela disengkaum dalam kunterik ngintu pemaik jalai.
“Ba taun 2016 tu, RM40 juta udah diagihka ungkup kunterik ngintu pemanah jalai ke dikuasa Perintah Besai di serata nengeri ke alai Sarawak diberi RM5 juta.
“Penyampau nya mungkur 100 kereja lalu 30 kunterik ungkup Pelilih Kuching diundi sehari tu,”ku iya seraya madah jalai Perintah Besai di Sarawak bisi pemanjai 1,540 KM.
Ungkup Pelilih Sarikei bisi 6 kereja lalu mungkur penyampau belanja RM300 ribu, Samarahan 9 kereja (RM450 ribu), Sibu 12 kereja (RM600 ribu), Limbang 19 kereja (RM950 ribu), Miri 7 kereja (RM350 ribu), Bintulu 9 kereja (RM450 ribu) enggau Sri Aman 8 kereja (RM400 ribu), tandu Fadillah.
Fadillah ke mega Kaban Parlimen (MP) Petra Jaya nambah kunterik mit ungkup kunteriktor kelas G1 nya asil pemeri ari konsesi besai ke udah dichiri ngintu pemanah jalai.
Ku iya, penetap udah disetuju enggau perintah dia konsesi besai deka ngagih enda kurang ari 30 peratus penyampau kunterik sida diberi ngagai kunteriktor Bumiputera kelas G1.
“Ba taun 2015, penyampau 47 kunteriktor mit Bumiputera Sarawak teulihka pemaik ari kunterik tu lalu nya mungkur belanja RM63 juta.
Entara sekeda kereja ke dibungkur dalam kunterik tu iya nya nampal lubang jalai, nebas rumput, ngelasi parit, ngaga garis jalai enggau kereja mit bukai,” ku Fadillah.
Ngenang kaul bukai, Fadillah madah Perintah Besai deka ngeluar belanja penyampau RM17.5 juta dikena ngemanah perengka guna ke rusak ba musin ampuh bah bedau lama tu tadi.
Ku iya, RM7.5 juta deka dikena ngemanah jalai (Perintah Besai) ke rusak lalu laluh RM10 juta dikena melanja kereja ngintu tanah ke tusur di tisi jalai.
Bela datai Menteri Pemansang Infrstruktur enggau Penyambung Dato Sri Michael Manyin, Menteri Muda Penyambung Datuk Lee Kim Shin, Direktor JKR Sarawak Ir. Zuraimi Sabki.-Borneo Post
Post a Comment