KUCHING: DAP Sarawak nagit menang ba lima ari sebelas penuduk baru rambau Pengawa Bepilih Nengeri ke-11 (PRN11) ke disadang diadu barang maya berengkah ari diatu.
Chairman DAP Chong Chieng Jen madah, parti nagit teulihka pemujur nya bepelasarka pekara ke nyadi dalam menua maya ke diatu nyengkaum skandal ke bekaul enggau Menteri Besai, Chukai Barang enggau Servis (GST).
“Penyarut ke ditapi parti dalam serakup Barisan Nasional (BN) iya nya Parti Progresif Demokratik Sarawak (SPDP) enggau Parti Se’Ati Rakyat Sarawak (SUPP) mega nyadi kebuah tagit DAP nya diasai ulih dijapai,’ku Chong.
Nitihka penerang ari Chong, DAP ngining 35 nyentuk ngagai 40 penuduk, nyengkaum 12 ke udah diempu diatu.
Chong nambah, penyandang penuduk ari DAP deka ngenanaka penuduk diri ke alai parti mega pechaya ulih menang lima ngagai 10 penuduk ke majoriti bansa Dayak di menua pesisir.
Iya mansutka jaku tu ngagai pengarang berita rambau pengerami Malam Media DAP ke diatur di Hotel Century ditu, malam ensanus.
Program Impian Sarawak ku Chong udah dipejalai kenyau 2 taun ke udah, lalu ketegal nya parti udah meretika asai ati peranak di tetiap kandang menua.
Nimbal jaku Sekretari Besai BN Nengeri, Datuk Dr Stephen Rundi ti madah BN ulih ngerampas tiga penuduk ke dikuasa DAP, Chong madah DAP deka ngenanka penuduk nya.
Bela datai ADUN Padungan Wong King Wei, ADUN Pending Violet Yong, ADUN Batu Kawah Christina Chiew enggau MP Stampin Julian Tan.
-Borneo Post
Post a Comment