KUCHING: Kepala Menteri Datuk Patinggi Tan Sri Adenan Satem kemari udah mantaika nama 11 iku chalun Parti Rakyat Sarawak (PRS) ti deka bediri ngarika Barisan Nasional (BN) maya Pengawa Bepilih Nengeri ke-11 (PRN11) enda lama agi.
Chairman BN Nengeri nya madahka PRS diungkupka 11 sitak DUN ti nyengkaum dua DUN baru, iya nya DUN Murum enggau DUN Samalaju.
“Aku deka mantaika nama chalun Barisan Nasional (BN) ti nyadi sebagi ari tim aku, aku udah setuju nerima nama ke diberi PRS nya nyadi chalun maya PRN 11 enda lama agi.
“DUN Balai Ringin diarika chalon Snowdan Lawan (penyandang); Bukit Begunan, Datuk Mong Dagang (penyandang); Batang Ai, Malcom Mussen (penyandang); Ngemah, Alexander Vincent (penyandang); Tamin diarika Christopher Gira (chalun baru, nyilih penyandang Datuk Joseph Mauh);
“DUN Kakus diarika John Sikie Tayai (penyandang); Pelagus, Wilson Nyabong (chalun baru); Baleh, Tan Sri Datuk Amar James Jemut Masing (penyandang); Belaga, Liwan Lagang (penyandang); Murum, Chuk Pai Ugon (chalun baru) enggau DUN Samalaju, Majang Renggie (chalun baru),” ku iya seraya madahka nya sebagi ari tim iya dalam BN.
Nambahka lebuh ditanya bekaul enggau kemaya rintai nama ari parti komponen BN ke bukai deka dibantaika, Adenan madahka nya deka dipadahka enda lama agi lalu bisi sekeda udah dipadahka.
Ditanya bekaul enggau parti ke bisi penyarut dalam parti sereta chara deka mutarka penanggul nya, iya madahka pekara nya deka diputarka sebedau ngantung nama.
“Penanggul ti nyadi entara Parti Rakyat Bersatu Sarawak (SUPP) enggau Parti Rakyat Bersatu (UPP) sereta penanggul entara Parti Tenaga Rakyat Sarawak (TERAS) enggau Parti Demokratik Progresif Sarawak (SPDP) aku arap bendar penanggul deka diputarka sebedau hari ngantung nama,” ku Chairman BN Nengeri nya.
Kelimpah ari nya lebuh ditanya baru kemaya iya deka betemu enggau Tuai Megai Menua Sarawak (TYT) lalu minta pemendar DUN diketu, Adenan madah, enda lama agi.
“Enda lama agi deka betemu enggau TYT,” ku iya ti tetap enggai madahka timpuh ke bendar maya iya deka betemu enggau TYT bekaul enggau pengawa ngetuka DUN.
Pengudah betemu sereta minta pemendar TYT dia DUN deka diketu lalu udah nya bepanggai ngagai SPR (Komiti Pengawa Bepilih) nentuka timpuh ti patut PRN11 diatur, ku iya.
Dulu ari nya Adenan ngulu pengerami Ketuai Begulai enggau Rayat DUN Batu Kawa enggau DUN Batu Kitang ke diatur ba BCCK.
Nyempulang Adenan mantaika nama chalun PRS kemari, Presiden PRS Tan Sri Datuk Amar James Jemut Masing, Menteri Dagang Temuai Datuk Amar Abang Johari Tun Openg, Menteri ba Opis Menteri Besai Nancy Shukri, Menteri Muda Pengawa Berumah Datuk Abdul Karim Rahman Hamzah enggau kebukai.-Borneo Post
Post a Comment