BETONG: Sapit Kepala Menteri Datuk Patinggi Tan Sri Alfred Jabu anak Numpang enda agi bediri ngenanka penuduk iya di sitak Layar ba Pengawa Bepilih Nengeri ke-11 (PRN 11) ti disadang deka diatur enda lama agi, ke lalu ngujungka pengawa politik pengelama 42 taun tu ke udah.
Berindik ari nya,Mandal Kanan Presiden Parti Pesaka Bumiputera Bersatu (PBB) Datuk Amar Douglas Uggah dibai pulai kitu ngambika ulih bediri ba sitak Bukit Saban ba PRN 11 tu ila.
Pekara tu dibantai Kepala Menteri Datuk Patinggi Tan Sri Adenan Satem ba sebengkah Pengerami Ketuai Begulai enggau Rayat di Dewan Mensia Mayuh Debak, 36 km ari Pasar Betong, kemari.
Adenan mega madahka penyandang sitak DUN Lingga ke diatu, Simoi Peri mengkang ngetanka penuduk iya lalu baka nya penyandang sitak Saribas, Razi Sitam agi ngetanka penuduk iya ba sitak nya.
“Sehari tu, aku bediri ba mua kita enggau ati ke sinu laban siku ari ketuai ke udah lama enggau kitai deka ngetu ari pengawa politik. Terima kasih ngagai Sapit Kepala Menteri, awakka servis iya dirikod nyadi Kaban Kunsil Nengeri (DUN) pemadu lama gawa ke menua tu,” ku Adenan madah lebuh bejaku ba mua urung 1,500 iku ke sama bisi ngulu pengerami nya.
Ku Adenan, pemutus Jabu nya digaga iya ke pemujur parti nya jemah ila.
“Iya (Jabu) endang seruran enggau kami, baik nya dalam tusah tauka senang. Pengudah iya ngetu ba servis Perintah berasai endar ba kitai ila,”ku iya.
Nangkan nya, Adenan madahka iya meri awak ngagai Jabu milih sapa ke dikedeka ati nyilih iya ba penuduk nya, ke deka dipadah enda lama agi.
Dulu ari nya, Jabu ke deka manggai ba umur 76 taun (bulan Oktober tu ila) madahka tuju iya enda agi ngetanka kerusi Layar ke udah dipegai iya kenyau ari taun1976 kelia, laban deka meri peluang ngagai rebak baru ngenegapka parti nya.
“Dalam kandang 42 taun udah enggau PBB kenyau ari ari 1974, aku udah gawa ari baruh niang Tun Abdul Rahman Ya’akub, Tun Pehin Sri Abdul Taib Mahmud lalu ke diatu Datuk Patinggi Tan Sri Adenan Satem.
Aku udah gawa ari baruh tiga iku Kepala Menteri, lalu enda sekali aku kala bejaika ketuai menua tu.
“Aku beratika chara iya gawa endang amat siru ke rayat. Aku meri terima kasih ke iring embing nuan sereta nuan ke nyadi ketuai kami (Adenan). Kami nyukung polisi nuan kelebih agi ngemansangka rayat di menua pesisir,” ku iya.
Jabu nandu baru, pemutus iya deka badu ketegal deka ngemansangka rebak baru jemah ila.
Jabu ti kala gawa nyadi pemesai ba Opis Betanam Betupi di Sibu sebedau ke masuk politik lebuh manggai umur 33 taun, lalu bediri di Engkilili-Skrang ba pengawa bepilih mit dalam taun 1973, berindik ari Simon Dimbab Maja ke ngetu ari politik.
Ba pengawa bepilih mit nya, Jabu menang darat.
Ba Pengawa Bepilih Nengeri taun 1974, Jabu ngalahka ex-Kepala Menteri Tan Sri Datuk Amar Stephen Kalong Ningkan di Layar, penuduk alai Jabu dalam kandang semilan penggal nyentuk ke diatu.
Ba Pengawa Bepilih Nengeri taun 2011 (PRN 10), Jabu mengkang ngetanka kerusi iya betapi nengah empat sukut ngalahka Joe Unggang (SNAP), Stanny Embat Pharoh Laja (PKR) enggau chalun Bediri Nagtika Diri, Tedwin Ngumbang enggau majoriti undi, 1,916 undi.
Jabu ke graduet ari Universiti Canterbury, New Zealand, sereta bepengelandik dalam bidang Sains Betanam Betupi nyadi menteri ke pemadu lama mangku pengawa iya.
Kelimpah ari nya, penyandang Bukit Saban ke diatu, Robert Lawson Chuat, bisi didinga rita deka bediri maya Pengawa Bepilih Besai Menua (Parlimen) ti di sadang deka diatur dua taun ari diatu.
Lebuh dikerandau pengarang berita sepenembu pengerami nya, Uggah madahka nya siti ari basa ketegal udah milih iya lalu madahka diri deka nyendiaka diri napi pengawa bepilih nengeri tu.
Uggah mega madahka diri deka ngetu mangku pengawa nyadi Menteri Industri Kebun Bedandang Besai enggau Komoditi ba renggat Perintah Besai laban dipelabaka deka mangku pengawa nyadi menteri kabinet Sarawak.=Borneo Post
Post a Comment