SEMATAN: Menteri Kereja Raya Datuk Seri Fadillah Yusof mantaika sebana sentang penanggul ke ditapi maya ngaga tauka ngemanahka projek bebilion ringgit, Jalai Besai Pan Borneo.
Iya madah, rayat ke ngambu nya tanah adat lalu deka kena teresa projek jalai besai, enggai nyerahka tanah sida.
“Kami bejaku kelebih agi sentang tanah ke nadai surat pala tanah tang diambu rayat dikumbai tanah adat bansa asal.
“Rikod ke bisi ba Opis Tanah enggau Survei mandangka pekara bebida. Tanah tu kebendar bisi rizab jalai tauka endang dipenggi perintah nengeri,” ku iya madah ditu kemari.
Fadillah madah, sida patyt ngemendarka tanah nya diambi endur ngemujurka projek ‘ke pemadu beguna’ tu laban iya deka meri penguntung ngagai semua orang laban enti tanah nya disimpan ungkup guna sida aja iya deka meri penanggul ngagai projek jalai besai nya.
Iya madah munyi nya ngagai pemberita pengudah ngulu taklimat ari Opis Kereja Raya Satawak sentang pejalai projek jalai besai ke beungkus RM16.5 bilion nya.
“Kami bisi belanja dikena kami mayar pampas ngagai sida. Tang kekadang maya kami udah mayar, sida nerima tang udah nya enggai pindah. Tu nyadi penanggul besai ngagai kami,” ku iya.
Fadillah madah, semua piak patut berunding panjai lalu naka ulih mutarka penanggul ngambika projek nya enda tejanggal.
Iya madah, muntang agi ngambi tanah ke bisi geran (surat pala tanah) laban iya bepelasarka undang-undang, orang ke ngempu tanah nya deka dibayar pampas nitihka rega tanah.
Nangkan nya, Fadillah madah pemar bukai ke ditapi iya nya mindahka perengka utiliti ngambika enda ngachau bekal elektrik, arus penyambung tauka bekal ai ke diguna mensia mayuh.
“Pengawa mindahka utiliti tu patut nitihka atur ke betul. Pekara tu begunaka besai belanja sereta patut digaga silik. Kami begunaka orang landik bejalaika pengawa tu.
“Kami bekerejasama enggau kompeni utiliti dikena nentuka iya ulih dipejalaika enggau manah,” ku iya.
Fadillah ke mega nyadi Kaban Parlimen Petra Jaya, madah nengah atur meri kuasa ari perintah besai ngagai perintah Sarawak, perintah nengeri deka bejalaika atur bekaul enggau pemujur pengawa ngaga jalai besai tu.
Tu nyengkaum mayuh meri awak ngagai kompeni bumiputera Sarawak ke bisi puku urung RM6 juta bejalaika pengawa baka masang papan pal enggau mayuh agi ke bukai. — Borneo Post
Post a Comment
EmoticonClick to see the code!
To insert emoticon you must added at least one space before the code.