KANOWIT: Tuai raban bansa enggau tuai rumah dipinta besaup mantaika penusah tauka penanggul ke bisi ditapi rayat ke dipegai sida.
Kaban Kunsil Nengeri (ADUN) Ngemah Alexander Vincent madah, tanggungpengawa nya ukai semina ditemu aja tang enda tau enda dikenataika raban sida tu ngagai piak bekaul.
“Kami ngarapka raban kita (tuai raban bansa) anang semina ngemataka aja tang saup perintah mantaika nama penusah tauka penanggul ke bisi nyadi ba rayat di menua kita.
“Anang diau diri aja laban kita sama bisi diberi elawin ngambika mujur agi ngereja tanggungpengawa ke udah dilempai ngagai kita,” pia ku iya madah.
Iya mantaika jaku tu maya dikanggau ngulu pengerami Nyuaka Setipikit Ngagai Tuai Rumah Saoh Lebak ba Nanga Aya, Kabah, Kanowit, hari Enam tu tadi.
Bela bisi datai nyempulang Alexander maya tu iya nya Sekretari Politik Kepala Menteri Maurice Giri, Penghulu Juin Adan, Penghulu Ugap Seribu, Penghulu Bernabas Angkis,Penghulu Ijam Tuah, Kaunsilor Bunut Kubu enggau Tuai Rumah Saoh.
Nambahka nya, ku Alexander, perintah pegai Barisan Nasional (BN) semampai ngemeratka pemansang baka ai, jalai enggau karan enda ngira endur tauka ba rumah panjai.
“Semua pengeransing perintah tu mega bela diasaika kitai di DUN Ngemah ditu,” ku iya madahka baru.
Berindik ari pekara nya, iya ngarapka rayat landik nimbal pengeransing perintah nya ngambika semua pelin pemansang ke deka diatur enda tejanggal.
Ketegal nya mega ku iya, rayat megai tanggungpengawa ke besai nentuka BN mengkang megai DUN Ngemah udah Pengawa Bepilih Besai Nengeri (PRN) ti deka datai.
“Kita empu bela tau meda nama pemansang ke udah diasaika kitai di Ngemah ditu dalam kandang lima taun ke udah.
“Ba aku, aku endang semampai deka nurun betemu betungga mua enggau kita empu enda milih ba sebarang aja pengawa tauka pengerami.
“Ari tu aku empu ulih nyemetak nemu nama bagi ke patut digaga ungkup rayat ditu,” pia ku iya.
Ba pengerami tu, Alexander bisi nyuaka bantu RM15,000 ngagai komiti pemansang enggau penge-likun genturung pendiau (JKKK) rumah panjai 19 pintu nya.-THE BORNEO POST
Post a Comment