LUNDU: Kepala Menteri Datuk Patinggi Tan Sri Adenan Satem ngelalau rayat badu agi ngumbai raban bansa China nya ‘orang datai’ laban menua Malaysia, Sarawak sama bela diempu kitai semua.
“Rayat bansa China ada ditu, besai ditu, belaki bebini ditu, parai ditu….Kita semua rayat menua tu, anak Sarawak baka orang bukai nya mega,” ku iya. Ku iya, baka sekula peribit China, tebal agi sekula bansa China di nengeri tu udah diberi perintah geran kenyau ari taun 2014.
Ku iya, dalam taun 2014 perintah udah meri RM3 juta, 2015 (RM4 juta), lalu taun tu RM5 juta deka diberi ngagai sekula China di nengeri tu.
“Baka nya mega enggau pemutus peresa ke nembiak China ke ngena ‘United Examination Certificate (UEC)’, Sarawak ngakun setipikit kita. Enti sema anak kita deka gawa ba opis Perintah ngena setipikit nya, kami nerima, lalu baka nya mega enti deka minta skolarship tauka nginjau duit ari Yayasan Sarawak.
Tebal agi universiti peribit di nengeri tu udah nerima nembiak ke ngena setipikit UEC, semina universiti perintah ke bedau nerima sida,” ku iya.
Nengah awak nya mega, iya ngelalau rayat di Lundu anang begilik sukung ari Barisan Nasional (BN) maya Pengawa Bepilih Nengeri ke-11 (PRN 11) tu ila.
Nitihka pengingat iya, maya PRN dalam taun 2011 bisi pupu bansa China ngundi Parti Islam Se-Malaysia (PAS).
“Enti kita (bansa China) berunding deka ngundi PAS, nya barang ku kita. Enti kita deka meda ukum Hudud mujur dipejalaika, undi mih PAS.
“Tang ku aku, berunding enggau manah. Diatu Parti Tindakan Demokratik (DAP) enggau PAS dah enda sebulu agi, seruran charut….Anang sesekali kita ngundi parti luar ari Sarawak,” ku Adenan.
Iya bejaku munyi tu ba Pengerami Makai Lemai Chap Goh Mei ti diatur ba dewan sekula SJK Chung Hua Lundu enggau Pra-sekula Chung Hua Lundu semak ditu malam ensanus ke bela digulu lebih 3,000 mensia mayuh.
Ba sentang pemansang di Pelilih Mit Lundu ku Adenan, pelilih mit nya dikemansangka perintah Barisan Nasional (BN) nengah Kaban Parlimen Santubong ti mega Menteri Pengeraja Asal enggau Rampa Menua, Datuk Seri Wan Junaidi Tuanku Jaafar sereta iya empu.
Adenan mega madah dalam timpuh dua taun ke udah, iya udah mujur bejalaika 50 polisi ungkup nengeri Sarawak, lalu semina siti aja dipinta aku ngagai Menteri Besai (PM), kitai enggai UMNO tama kitu (ke Sarawak).
“UMNO enda dikelalu tama kitu, aku empu madah ngagai PM. Anang tama ke Sarawak laban kitai udah bisi PBB, PRS sereta parti bukai ari Sarawak,” ku iya.
Lalu pia mega ngagai raban ekstremis ba jalai pengarap ke mayuh udah ditagang tama ke Sarawak, ku iya.
“Orang baka Ibrahim Ali, Ridhuan Tee enggau orang bukai, anang sesekali tama ke Sarawak. Menua Sarawak lantang sereta likun, nya alai nadai kebuah sida tu kitu ngachau kitai.
“Melayu,China, Iban, Bidayuh, Orang Ulu ulih duduk begulai, sama makai, sama ngirup,” ku iya.
Kelimpah ari nya iya mega madahka menua Sarawak enggai tinggal ari pemansang infrastruktur baka ke bisi di semenanjung.
Baka jalai alun ti dikemisi di semenanjung ku iya, Sarawak pan enda lama agi deka bisi jalai alun ke manah sereta ti pemadu panjai di Sarawak, iya nya Pan Borneo Highway ti udah belabuh digaga urung 1,000 km ari Lundu ke Lawas.
“Seagi-agi aku nyadi Kepala Menteri kita, aku deka ngarika kitai, enti enda baka nya anang nyebut aku Kepala Menteri kita.
Nya kebuah aku minta lima taun agi ngambika aku ulih nampung pengawa ngaga pemansang ke nengeri tu.
“Beri BN pemujur ke besai ngambika aku ulih bejaku enggau Kuala Lumpur, aku pengari ari nengeri Sarawak deka madah ngagai Perintah Besai sentang utai ti dikedeka kitai. Enti kitai menang besai, sida deka mendingka kitai. Enti kitai deka mantu Sarawak, undi mih BN,” ku iya ti mega nyadi Chairman BN Nengeri Sarawak sereta ADUN Tanjung Datu.
Dulu ari nya lebuh ke bejaku ,Wan Junaidi madahka iya pechaya rayat di Lundu deka terus nyukung Adenan maya PRN 11 tu ila.
“Aku ngarapka sukung kita semua ngagai Kepala Menteri, ngambika mayuh agi pemansang ukai semina ari sukut pengawa rama, pelajar, ekonomi tang ke berat endar iya nya penyerakup pupu bansa di nengeri tu, “ ku iya.
Sama bisi ngulu atur pengawa nya malam ensanus, Wan Junaidi enggau bini iya, Datin Seri Feona Norjanah Wan Junaidi, Menteri Muda Pemansang Raban Bansa ti mega ADUN Tasik Biru Datuk Peter Nansian, ADUN Opar Ranum anak Mina enggau Presiden SUPP Prof Datuk Dr. Sim Hui Kian.-THE BORNEO POST
Post a Comment