ENGKILILI: Raban pengundi diperansang sama besaup nyukung semua chalun Barisan Nasional (BN) maya Pengawa Bepilih Besai Nengeri (PRN) dikena nentuka sida ulih meri mandat besai ngagai perintah ke betuaika Kepala Menteri, Datuk Patinggi Tan Sri Adenan Satem.
Kebuah pia laban polisi dipejalaika Adenan balat ngemeratka peminta semua komuniti kelebih agi di kandang menua pesisir sereta nadai ngemeluka raban komuniti ke diau di mengeri.
Kaban Kunsil Nengeri (ADUN) Engkilili Dr Johnical Rayong Ngipa madah, mayuh pemujur udah dipejalaika Kepala Menteri sekumbang udah mangku pengawa ngiring nengeri tu.
“Ukai deka muji tang nya mih pekara ke udah nyata digaga iya sekumbang udah ngiring nengeri tu, lalu pengawa nya endang patut dipuji semua kaban parti nyengkaum penyakal,” ku iya.
Iya mantaika jaku nya rambau Pengerami Pemesai Begulai Enggau Rayat di Rumah Sirai Minggu, Marub Baruh di Engkilili, apin lama ke udah sereta bisi digulu Pengulu Inchang Anchih, Pengulu Gerang Ancheh, pengari ari Kaunsil Pelilih Lubok Antu, Melo Agan, Chairman Gerempung Tuai Rumah Engkilili, Tuai Rumah Sibat Krutap, raban kaunselor, bala tuai rumah sereta urung 300 temuai ke bukai.
Nya alai, iya meransang rayat terus meri mandat ngagai Adenan sepenggal agi terus ngiring nengeri tu ngambi rayat ulih ngasaika mayuh agi pemansang.
Ketuai Raban Nembiak ke mega nyadi Sapit Presiden Parti Rakyat Bersatu (UPP) nya madahka, Adenan chukup siru ke peminta rayat di nengeri tu lalu udah bebendar mai peminta peranak Sarawak ngagai tikas Perintah Besai.
“Iya enggai meda Sarawak baka anak iru perintah besai sereta deka meda pemansang ditu digaga sebaka enggau di Malaya, “ku iya.
Dr Rayong, ngarapka pengundi enda masau undi mangkah chalun penyakal ke nadai mai sebarang pemaik kelebih agi ngagai komuniti menua pesisir.
“Penyakal sigi pintar ngambi ati sereta jaku sida chukup manis didinga tang pekara ke bendar iya nya sida semina pandai bejaku bula sereta enda ulih dikearap mai pemansang kelebih agi ngagai kandang menua pesisir.
“Belajar sereta pendingka nasit sitak Kaunsil Nengeri (DUN) ti dikuasa sida, lima taun tinggal sereta nadai pemansang.
“Rayat napi pengerugi laban sida agi tubah begunaka pemansang ke semina ulih dipujurka BN aja.
“Nya alai, sekali agi aku minta raban pengundi kelebih agi ba sitak Engkilili ditu ngambika terus nyukung aku ti deka ngetanka penuduk DUN tu ngarika BN sereta nengah tim ke tegap begulai enggau Adenan,” ku iya seraya ngelalau sida ke kala tebambang singkang nyukung penyakal sebedau tu patut nikal baru ngagai perintah BN ke pemaik jemah.
Ba pengerami nya, Dr Rayong ngemendarka geran Projek Mit Pemansang Menua Pesisir (MRP) ngagai sekeda Komiti Pemansang Enggau Pengelikun Genturung Pendiau (JKKK), Biro Orang Indu sereta sekula ngelingi Engkilili sepenyampau RM91,000 lalu JKKK Marub Baruh nerima penyampau RM30,000 sereta Biro Indu nerima RM5,000.-THE BORNEO POST
Post a Comment