Pampang PBB Bukit Semuja ngarap DUN nya diberika PBB

SERIAN: Parti Pesaka Bumiputera Bersatu (PBB) pampang N.23 Bukit Semuja ngarapka sitak Kunsil Nengeri (DUN) ke baru nya diberi ngagai PBB.

Sekretari Protem PBB pampang Bukit Semuja, Awang Reduan Awang Idi madah, pinta ba sentang pekara nya dikenatai ngagai Kepala Menteri ke mega Presiden Parti PBB Datuk Patinggi Tan Sri Adenan Satem.

“Ngarika semua kaban dalam PBB pampang N.23 Bukit Semuja,kami minta Adenan berundingka pinta enggau peneka kaban parti PBB ngambika sitak N.23 Bukit Semuja diberi ngagai PBB.

Kami minta penuduk tu ketegal sitak N.23 Bukit Semuja ditempa ari dua kubu kuat parti iya nya N.18 Tebedu enggau N.19 Kedup.

“Ukai mudah kami dalam pampang ngelaban pengamat tu lalu enda mega sengapa nyerah ngagai parti bukai,’ku iya.

Awang Reduan mansutka jaku tu ba seiti aum pengarang berita ke diatur di Balai Mensia Mayuh Serian kemari ti bela digulu Chairman Protem, Cr.Gabriel Kajeh Menggu.

Nyukung pinta sida nya, Awang Reduan madahka penegap PBB di Bukit Semuja sigi enda ulih dilaban parti bukai.

Ku iya, PBB di Bukit Semuja bisi 23 ranting ke tegap ti ngembuan 2,584 iku kaban ari N.19 Kedup enggau 1,489 iku ari N.18 Tebedu, ke alai semua penyampau nya bisi 4,073 iku kaban.

“Penyampau nya ngarika satu pertiga penyampau orang ngundi ba N23 Bukit Semuja ke alai kami pechaya PBB ulih menang mudah ba penuduk baru tu,’tandu iya.

Ngenang kaul ke sama,Gabriel ba aum pengarang berita nya madahka nama chalun ti dikearap ulih menang ari PBB ungkup penuduk nya udah dianjung ngagai Kepala menteri.

Nitihka penerang ari iya pampang bisi tiga iku chalun ke dikearap ulih menang lalu barang sapa ke dipilih deka nerima sukung ke tegap ari kaban PBB.

“Taja pia, enti ketuai renggat tinggi Barisan Nasional (BN) mutus meri penuduk nya ngagai parti bukai, kami PBB pampang Bukit Semuja deka tetap nyukung,’ku iya.

Kelimpah PBB, N23 Bukit Semuja disadang diberi ngagai Parti Sa’ati Rakyat Sarawak (SUPP), ke alai sapit presiden parti nya ke mega MP Serian, Datuk Seri Richard Riot Jaem udah dichiri milih chalun ari bansa Dayak ngarika parti.

Ngenang sentang pekara nya, Gabriel enda nyakal Riot ke mega Menteri Pengatur Pemayuh Pengereja Pengawa ngembuan sukung ke tegap ari rayat ngelingi Serian.-Utusan Borneo