ULU SKRANG: Perintah sigi nadai ati deka ngerampas tanah Adat Bansa Asal (NCR) ke diempu rayat, ku Kaban Kunsil Nengeri (ADUN) Engkilili Dr Johnical Rayong Ngipa.
Nya alai, enti perintah bisi beguna tanah kena ngatur pemansang baka ngaga jalai alun, sekula enggau utai bukai sigi deka nengah atur ka terit ari ajensi perintah ka bekaul.
Iya madah isu tu tebal agi nyadi ba penyakal dikena ngulihkan sukung ba politik sida.
“Perintah nemu isu NCR sigi sensitif kelebih agi ba raban Dayak, nya alai perintah ari suba bebendar ngaduka tanah NCR lalu sigi ngeringka hak orang beempu tanah nya.
“Beduduk ari tu, perintah udah lama ngakun tanah NCR lalu ngansak orang beempu tanah nyukat tanah sida ngambi diberi surat pala tanah,” ku iya lebuh bejaku ba Rumah Ambu Jilom, Emperan, di Ulu Skrang apin lama ke udah.
“Nya alai, petenah raban penyakal ke ngumbai perintah deka ngerampas tanah NCR rayat lalu balat nyadi isu maya kimpin sida endang enda amat lalu digaga dikena nguntungka politik sida aja lalu nadai ati nulung rayat ba senentang tu,” ku iya.
Lebuh ngenang pemansang ba Ulu Skrang kelebih agi konstituensi Engkilili, Dr Rayong keran madah deka ngatur sereta bebendar agi mai pemansang ka rayat iya.
“Kadang-kadang endang amat pemansang laun datai tang tu ukai disengajaka laban mayuh utai ngasuh iya nyadi…kelebih agi bekaul enggau penatai duit tang taja pia lambat laun pemangsang sigi datai nuntung rayat baka ka udah disemaya ngelamatu.
“Ambika banding, suba nadai orang nyadang kitai ba Ulu Skrang bisi jalai alun tang diatu kitai udah bisi jalai lalu deka dipelakin sepengudah RMK11 tu abis,” ku iya seraya nambah pengawa ngaga tujuh iti jambatan ka berega RM3.6 juta diatu benung berengkah ba Nanga Tebat.
Ku iya, udah nyendiaka jutaan ringgit setaun kena ngaduka bekal kuasa karan kelimpah ai beresi ka deka benung digaga sepemanjai RMK11 tu.
“Ngenang pasal bekal elektrik, mayuh rumah panjai udah datai tali karan…lalu ngarapka pekara tu ulih dikemujur,” ku iya.
Udah nya, Dr Rayong ngansak rayat kelebih agi bala pengundi terus nitihka Barisan Nasional (BN) maya Pengawa Bepilih Besai Nengeri ke datai tu.
Berebak enggau nya, Dr Rayong bisi ngungkupka geran MRP ngagai Komiti Pemansang enggau Pengelikun Genturung Pendiau (JKKK) Rumah Ambu Jilom penyampau RM10,000 udah nya Biro Indu sida enggau Gerija SIB bela bulih RM5,000 enggau RM3,000.
Nangkan nya sekeda JKKK, Biro Indu, gerija sereta menua di Ulu Skrang bela nerima geran ari Dr Rayong penyampau RM98,000.
Bela bisi datai pengari KEMAS Engkilili, Opis Pemadah, JASA, Penghulu Chaong Impin, kaunselor enggau bala tuai rumah di Ulu Skrang.-THE BORNEO POST
Post a Comment