KUCHING: Sapit Chairman Parti Keadilan Rakyat (PKR) Sarawak, See Chee How minta Perintah Besai nyendia agih belanja ungkup Sarawak dikena ngemujur semua operasyen rambau napi penusah ampuh bah sereta bantu bukai.
Meretika Menteri Besai Datuk Seri Najib Tun Razak deka datai ke Sibu ngulu Pengerami Ngelalu Pengabang Taun Baru Cina Renggat Menua malam ila, See madah penemuai nya patut mai berita manah ke lebih agi ungkup sida ke dituntung penusah ampuh bah di nengeri tu.
“Pengudah ngerami Taun Baru Cina sereta nyaguka ‘Yee Sang’, aku arap Menteri Besai ngingat lalu meratka pekara ke nyadi di Sarawak maya ke diatu,”ku iya ba seiti aum pengarang berita kemari.
See ke mega Kaban Kunsil Nengeri (ADUN) Batu Lintang ngenatai perambu diak Komiti Pengintu Penusah Nengeri meri penerang ngagai Najib sentang 2 penusah ampuh bah ke udah balat nuntung peranak ke diau ngelingi Kuching, Batu Kawah, Batu Kitang, Bau,Samarahan enggau Serian.
Najib patut dikeingat diak Perintah Besai mengkang bedau besemaya deka meri belanja dikena mantu orang tasah bah lalu pekara tu enda ulih diterima,tandu See.
Ngenang kaul ke sama,See nambah Komiti Pengintu Penusah Nengeri udah bejalaika tanggung pengawa enggau manah, mindah sereta nyelamat mansa rambau napi penusah.
Ketegal nya See ngarap Najib ulih nyendia agih belanja ungkup komiti ngambi tau dikena nyendia perengka sereta ngangkatka pengulih kereja komiti.
“Kelimpah ari nya, Najib nega patut enggau lengkas ngagih bantu belanja ngagai sida ke tasah bah ngambi tau ngelempung belanja meresi,ngemanah rumah sereta nganti perengka ke udah rusak.
“Iya mega patut enggau lengkas ngemendar projek nyeliah penusah bah ‘Flood Mitigation’ di serata nengeri ke udah diperambu,”ku See.
Nitihka penerang ari See, projek nya udah lama diperambu lalu patut udah tembu betaun ke udah.
Berindik enggau nya lalu dikena nyeliah penusah ampuh bah, See ngarap Menteri Besai ngembuan komitmen ngelengkas mungkal semua projek tu, digaga sereta ditembu.-BORNEO POST
Post a Comment