KUCHING: Projek ngaga Jematan Batang Lupar deka nyaup ngeransing pengawa nyendia atur pemansang di menua pesisir, ku Menteri Pengawa Berumah Datuk Amar Abang Johari Tun Openg.
Bejaku ba seiti aum pengarang berita kemari, iya nambah projek ke udah dikemendar Perintah Besai nya deka nyendia atur penyambung ngagai menua pesisir sereta kandang endur ngelingi.
“Ketegal nya kitai ulih ngeransing pengawa ngemansang kandang menua pesisir. Tembu ila jalai nebing tasik deka terus nuju Bintulu lalu disambung enggau Jalai Pan Borneo.
“Jematan Batang Lupar tu ila deka meri pangka besai ba pemansang nengeri tu lalu deka ngembing Sarawak nyapai pengelantang,” ku iya.
Bejurai panjai sentang projek nya, Abang Johari ke mega Menteri Dagang Temuai madahka palan endur nirika jematan nya benung diperunding Opis Kereja Raya maya ke diatu.
Ke pemadu beguna amat, projek Jematan Batang Lupar tu udah dikemendar Perintah Besai lalu deka nyadi seiti jematan ke pemadu panjai di Malaysia kelimpah ari Jematan Pulau Pinang, tandu iya.
Ngenang kaul ke sama, iya madahka Kepala Menteri Datuk Patinggi Tan Sri Adenan Satem netap ngemeratka pemansang menua pesisir ke alai agih belanja penyampau RM1 biliun udah disedia ungkup pengawa nya.
“Pekara tu disukung Perintah Besai ti deka ngemansang Jalai Pan Borneo ti begunaka belanja ke besai lalu benung diadu diatu,” ku Abang Johari.
Ba sebengkah pengerami Ketuai Begulai enggau Rayat ke diadu di Dewan Suarah Bintulu pengujung bulan Januari tu tadi, Menteri Besai Datuk Seri Najib Tun Razak netap Jematan Batang Lupar deka digaga di Sri Aman.
Projek nya ku Najib deka nyadi seiti Manifesto Barisan Nasional (BN) rambau napi Pengawa Bepilih Nengeri ke-11 (PRN11) tu ila, ke alai belanja dikena ngaga projek nya deka ditanggung Perintah Besai (50 peratus) enggau Perintah Nengeri (50 peratus).-THE BORNEO POST
Post a Comment