SIBU: Pengudah lama enda memunyi, pengujung iya Chairman Gerempung Konteriktor Pelilih Selangau Dali Merawing ti kala diperitaka seiku ari chalun ke bisi penau nukar Kaban Kunsil Nengeri (ADUN) Tamin Datuk Joseph Mauh Ikeh bisi nyaut entelah kebuah iya diau diri ngelama tu.
Berebak enggau nya, kelimpah ari Dr Ali Puji, Edwin Banta, Dali Merawing enggau Christoper Gira Sambang ke bisi dibantaika Mauh nama nuju Presiden Parti Rakyat Sarawak (PRS) Tan Sri Datuk Amar Dr James Jemut Masing, parti mega bisi nerima tujuh iku agi nama chalun bukai ke datai ari bala Tuai Rumah enggau kaban PRS Tamin ngujungka penyampau chalun tu bisi 11 iku.
“Taja pan bisi ngasai enda lantang ati tang pekara tepasa diterima enggau ati chukup asa.
“Kekadang iya endang chukup pedis. Tang kati ku enggau kitai patut nerima utai ke nyadi. Ulah ke taluk patut dipandangka kitai ba nenama aja pekara ke nyadi. Kitai patut ngingatka sumpah ke udah disebut maya nitihka Barisan Nasional (BN) ngelama tu,” ku iya ba sebengkah pengerami makai lemai begulai enggau Mauh sereta Gira ke digulu bala tuai raban bansa di pelilih Selangau ditu, apin lama ke udah.
Dali iya nya seiku ari ‘top 3’ dalam rintai chalun ke dipilih BN-PRS di DUN Tamin ke bisi dianjung nama ngagai ketuai parti sebedau tu.
Taja pia, iya nadai kena pilih nyadi chalun BN-PRS ungkup PRN 2016 nukar Mauh, lalu iya terang madah diri nerima pemutus ke udah digaga Masing dikena ngenegapka parti PRS enggau rayat ditu.
Nya alai, iya minta semua ketuai raban bansa nyengkaum bala Tuai Rumah terus nyukung Giran nyadi chalun PRS di DUN Tamin maya PRN 2016 tu ila.
Kelimpah ari nya, Dali mega ngelalau bala pemesai enggau kaban PRS di Tamin terus nyukung Gira.
Berebak enggau nya, Mauh madah lebih 95 peratus bala ketuai raban bansa nyengkaum bala pengulu enggau tuai rumah udah setuju sereta nyukung Gira nukar penuduk iya.-Utusan Borneo
Post a Comment