SRI AMAN: Pengajar ti kreatif sereta bepenemu ulih ngadaka raban nembiak sekula ke nyulut setipak juluk menua tu.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madahka, pengajar ti ngembuan dua bengkah penau nya sigi seruran berundingka pengawa ke baru ti tau mai ubah dalam pengawa sida.
“Nya alai kitai meransang bala pengajar di nengeri tu ngambika ngubah chara sida ngajar ngambika lebih kreatif sereta bepenemu dalam bejalaika tanggungpengawa sida ngajar.
“Chara ti kreatif enggau inovatif tu ulih matak pengagit bala nembiak belajarka sesebengkah subjek,” ku iya.
Iya ke lalu nyadi Kaban Kunsil Nengeri (ADUN) Simanggang mantaika jaku nya maya bejadika Pengerami Makai Lemai beserimbai Pengerami Taun Baru China Renggat Opis Pelajar Pelilih (PPD) Sri Aman 2016 diatur PPD Sri Aman begulai enggau Komiti Sekula Primari (SJK) Chung Hua Simanggang bepalan ba sebengkah hotel tebilang ditu ensanus.
Kenu ku iya, pengajar patut pintar mai ubah ngagai pengawa ngajar sida lebih kondusif ngambika tetiap pengawa ngajar ti dipejalaika sida nyapai juluk.
“Pekara tu beguna amat laban bala nembiak deka mantaika pengerindu sida belajarka sesebengkah subjek enti sema chara ngajar pengajar sida nitihka singkang kemaya hari,” ku iya nerang.
Berebak enggau nya, Harden mega minta raban apai indai ngambi ngemeratka pelajar bala anak sida laban sida tu ila deka nyadi ketuai sereta aset beguna amat bela ngemansang menua tu.
“Kitai ke nyadi apai indai anang sesekali enda ibuhka tanggungpengawa nganjung bala anak kitai besekula ngulihka penemu enggau naka ulih laban dunya kemaya hari tu, penemu nya beguna amat,” ku Harden nambah.
“Anang kitai ngumbai pengawa nganjung bala anak besekula nya pengawa ti nating kitai tang berundingka pengidup sida jemah ila.”
Tambah mega ku iya, penyeranta nya ukai kebuah ti ngasuh kitai enda nganjung bala anak besekula.
“Tang udah mayuh raban orang seranta nganjung anak sida besekula ngagai tikas pelajar pemadu tinggi lalu teulihka penyulut ba universiti,” ku iya
“Aku pechaya, mayuh apai indai diatu udah sedar tanggungpengawa diri nganjung bala anak sida besekula laban sida (apai indai) nemu semina penemu aja ulih ngubah gaya pengidup sida.”
Bekenang sentang pemansang teknologi pemadah enggau penyambung (ICT), ku Harden, raban nembiak kemaya hari tu patut nyikap diri sida empu ngena penemu ICT laban nya beguna amat kelebih agi maya sida besemekih ngiga pengawa.
“Apai indai patut bejalaika tanggungpengawa beguna amat meransang bala anak kita belajarka ICT. Enti sema bala anak kita enda landik ba ICT, chukup mar endur sida deka besemekih enggau bala nembiak ke bukai maya begigaka pengawa puang ila,” ku Harden nandu.
Sama bisi datai rambau pengerami nya iya nya Pemesai Pelajar Pelilih Sri Aman, Vevien Mujah, Chairman Pengatur Pengerami Makai Lemai, Cin Kui Nam, bala pengajar ari enam buah sekula China di Bagi Menua Sri Aman, raban ketuai komuniti sereta ngelui ari 500 iku temuai ke bukai.
Berebak enggau pengerami nya, Harden mega bisi nyuaka agih belanja penyampau RM12,000 ngagai SJK Chung Hua di Bagi Menua Sri Aman.-BORNEO POST
Post a Comment