Menteri Pengeraja Asal enggau Rampa Menua Kedua, Datuk Amar Awang Tengah Ali Hassan madahka, tuju sida ti bejalaika ngatur program di Marudi iya nya deka nentuka chalun BN ti udah dipilih ulih disukung rayat ke diau di kandang menua nya.
“Pekara ke beguna amat iya nya rayat Marudi enda tau enda akun sereta nyukung Adenan laban iya bisi tim ti kering enggau chalun ke udah dipilih bediri Marudi,” ku iya, ke lalu nyadi Mandal Presiden Kanan Parti Pesaka Bumiputera Bersatu (PBB).
Iya mantaika jaku nya rambau Program Ngenegapka Komiti Pengawa Bepilih Besai Nengeri DUN Marudi di Dewan Suarah Miri, ensanus.
Tandu Tengah, pengawa nyadi ketuai patut diberi ngagai Adenan dalam timpuh lima taun agi dikena neruska projek pemansang di menua pesisir.
Ku iya, sekumbang Adenan udah ngiring nengeri tu, perintah nengeri udah ngemendarka penyampau RM77.4 juta dikena bejalaika projek ngemanahka jalai Marudi-Miri, ngurangka chas servis feri ari RM15 ngagai RM1, projek bekal ai enggau elekterik menua pesisir sereta projek pemansang ke bukai pulaika pemanah ngagai rayat di Marudi.
Berebak enggau nya, Menteri Muda Rengka Rama (Bekal Ai) Datuk Sylvester Entri Muran madahka timbal ti diterima ari pengundi ke udah ngerejista diri bejalaika pengawa bepilih BN manah amat.
Iya ke lalu nyadi Kaban Kunsil Nengeri (ADUN) Marudi madah, piak sida melabaka bisi 1000 iku pengundi berejista di Marudi udah ngerejista diri ungkup pengawa bepilih BN, tang penyampau tubuh sida tu ngelui lalu tu kelai ke manah laban ngayanka sukung nguing ngagai BN enggau Adenan.
Program nya diatur kena nyediaka diri napi PRN di Marudi.
Pengelicha ba program nya udah diketuaika Speaker DUN ke lalu nyadi Chairman Mendam PBB Datuk Amar Mohamad Asfia Awang Nassar sereta Penyanding Penemu Pekara Undang-Undang PBB Datuk Awang Bemee Ali Basah.
Bala bukai ke sama datai iya nya Mandal Presiden Parti Tenaga Rakyat Sarawak (TERAS) Datuk Peter Nansian, Tukang Wang TERAS Paulus Palu Gumbang, ADUN Lambir Ripin Lamat, ADUN Bukit Kota Dr. Abdul Rahman Ismail sereta Sekretari Eksekutif PBB Awang Bujang Awang Antek.-THE BORNEO POST
Post a Comment