KUCHING: Barisan Nasional (BN) patut chakah sereta landik agi bejalaika pengawa dikena nambahka sukung rayat ba pengawa bepilih nengeri ke sebelas (PRN11) tu ila.
Sapit Menteri Besai, Datuk Seri Dr. Ahmad Zahid Hamidi madah, penyampau sitak ke ulih dimenang endang bepanggai ba raban pengawa bepilih.
“Kitai patut landik sereta gawa bebendar agi dikena nambahka sukung rayat.
“Gaya (politik) udah berubah, nya bepanggai ba pengelandik BN ngambika ulih menang, juluk nya bepanggai ba raban pengawa bepilih,” ku iya lebuh ditanya bekaul sereta peragam ati iya sentang penyampau BN ulih menang ba PRN11 Sarawak ti deka diatur tu ila.
Kelimpah ari nya lebuh ditanya nama penanggul ke ditapi BN, iya madah kelebih agi mutarka isu ti dibantaika penyakal ke enda kala betul.
“Kitai betapi enggau isu ke enda ngengetu dibai penyakal baka isu nuduh perintah, berita selebubu sereta madahka perintah enda ngamatka semaya enggau pekara bukai.
“Tang rayat nemu, lalu nya bepanggai ba rayat. Perintah semina nerang ngagai rayat ngambika rayat ulih manding isu ke dibantai penyakal,” ku iya.
Zahid mansutka pekara tu lebuh ti ngabang beserimbai enggau Taun Baru China 2016 ngagai Managing Direktor, KTS Groups Dato Henry Lau ba rumah iya ditu, lemai kemari.
Penatai iya ke ngabang nya disambut Henry Lau enggau bini iya, Datin Wendy Lau sereta Sapit Managing Direktor KTS Groups Stephen Lau enggau sida sebilik.
Iya (Zahid) disempulang Menteri Kanan ti mega Menteri Pemansang Tanah, Tan Sri Datuk Amar James Jemut Masing sereta Sapit Menteri Dalam Nengeri Masir Kujat ti udah ngawakka diri ngabang urung 40 minit.
Sepemulai Zahid ke ngabang nya, Lau lebuh ditanya pasal asai ati iya nerima penatai Menteri Dalam Nengeri nya ke ngabang beserimbai enggau Taun Baru China ngagai rumah iya, Henry Lau madahka diri berasai temegah ati.
“Berasai temegah sereta gaga ati. Tu penemuai iya ngatiak diri,” ku Henry Lau.THE BORNEO POST
Post a Comment