KUCHING: Presiden Parti Pekerja Sarawak (SWP), Larry Sng enggai ngelakka menua asal iya Kapit ke lebih agi penuduk baru Kunsil Nengeri (DUN) Bukit Goram dikuasa parti bukai.
Kelimpah ari nya, Larry mega enda deka ngelak rayat ke udah nyadi penyukung Sng sebilik kenyau ari jeman merdeka dikuasa parti bukai.
“Aku udah meri servis ungkup rayat ditu pengelama dua renggat iya nya berengkah ari taun 2001 nyentuk 2011. Dulu agi ari nya, apai aku (Datuk Sng Chee Hua) meri servis ngagai rayat ditu ari taun 1991 nyentuk taun 2001.
“Sebedau nya aki iya (apai Datuk Sng) udah dulu meri servis ngagai rayat di Kapit kenyau taun 1963 nyentuk taun1968.
“Kami peranak asal Kapit lalu sedia meri servis nengah komitmen ke tinggi,’ku Larry nengah sepuchuk surat penerang berita kemari.
Larry nambah,ba jeman Parti Bansa Dayak Sarawak (PBDS) suba, iya nya maya PBDS nyadi penyakal, sida sebilik udah nguna duit diri melanja mayuh projek ungkup rumah panjai sereta gerempung.
Ku iya, kami sebilik melanja projek ngaga Rumah Tubak, Nanga Ensilai pengudah rumah panjai lama angus laban api urung taun 90-an.
“Kami mega nguna duit diri melanja projek ngaga Sekula Hocklam maya sida beguna begunan sekula baru.
“Nyentukka diatu, taja pan aku enda nyadi pengari rayat agi, aku udah ngagihka belanja ngagai lebih 60 buah rumah panjai enggau gerempung kenyau taun 2014,’ku Larry.
Ngenang kaul ke sama, iya madahka sida sebilik mengkang nampung wang turu pelajar penyampau RM1 juta ungkup nembiak di Kapit sereta seruran mantu rayat ke sakit enggau ruang bilik ke bisi dituntung penusah pemati.
Semua tu ku iya, mandangka taja pan kami udah enda dalam perintah agi, tang kami mengkang ulih nyendiaka projek sereta meri servis ngagai rayat.
“Sigi enda disakal agi, rayat mengkang dekaka kami meri servis ungkup sida,”ku Larry.
Larry ke kala nyadi menteri muda dalam kabinet menteri Sarawak disadang deka bediri ngerebut penuduk Bukit Goram ba PRN11 ke disadang diatur ba bulan April 2016.-BORNEO POST
Post a Comment