SEMATAN: Projek ngaga Jalai Besai Pan Borneo endang bisi ngerunding pasal jelu siga ba sekeda endur ti kena keruga baka taman negara enggau kandang nupi jelu siga.
Menteri Kereja Raya Datuk Seri Fadillah Yusof madah, tuju atur nya dikena ngurangka pengawa ngachau pengidup jelu siga kelimpah nyaga rampa menua asal endur sida diau.
“Ba pekara nya, kitai bisi nujah Kandang Jelu Siga Samunsan ke diuan jelu kera, remaung, burung kenyalang, rasung, ungka enggau lelabi.
“Dikena muru bala kera, kami deka ngaga jematan urung 270 meter pemanjai iya nya lebih 100 meter dikena ngemuntangka sida bejalai ba sepanjai tebing sungai di baruh jematan tu,” ku iya.
Iya madah munyi nya ngagai pemberita pengudah ngabas pengawa ngaga Jalai Telok Melano-Sematan sepanjai 34 kilometer ditu ke beungkus RM580 juta, iya nya bagi menua keterubah endur ngaga jalai besai tu, ku ensana.
Bela bisi digaga iya nya palan raban penyaga jelu siga di sepanjai jalai di santuari tu dikena nagang pengawa orang ke ngasu, ku iya.
Fadillah madah pengawa ngaga jematan dua lurung tu deka meri pangka ke enda besai ngagai kayu besai di kandang menua nya, kelimpah bisi digagaka lampu dikena nyaga pengidup lelabi.
Ngenang sentang pengawa nya ke laun mimit, iya madah pekara berindik ari gaya hari ke enda tentu manah.
Jalai Telok Melanao-Sematan endang renggat keterubah dikena ngepunka pengawa ngaga Jalai Besai Pan Borneo ke ngembuan pemanjai 783.9km di Mengeri Besai Miri.
Projek tu dijangka tembu pun bulan Januari, 2019.-Borneo Post
Post a Comment