SERIAN: Serian udah ditetap nyadi sebuah Bagi Menua pengudah Kepala Menteri Datuk Patinggi Tan Sri Adenan Satem nyebut pasal pekara nya kena 11 April 2015, ke alai Bagi Menua Serian tu mungkur kandang menua Tebedu enggau Siburan.
Enggau nya,Serian nyadi Bagi Menua ke-12 di Sarawak, patut ngembuan Opis perintah enggau ejensi kediri empu ngambika enda betanya sentang pemansang ba bagi menua nya ngagai Bandaraya Kuching.
Kemari, Adenan lebuh bejadika sebuah komplek Opis Perintah Menua ti deka digaga Borneo Development Corporation (BDC) ke ungkus RM100 juta, Pasar Baru Serian ke deka nyengkaum urung 500 lebih genturung pendiau sereta 200 lebih rumah kedai baru sereta palan komersial, nyengkaum bejadika palan endur ngatur konferens besai ke deka digaga enggau rega RM80 juta ti muat endur urung 2,000 iku sekali baum.
“Diatu Serian udah nyadi Bagi Menua kediri empu, lalu sigi patut bisi komplek opis perintah kediri empu.
“Kos semua kompleks nya nyengkaum palan konferens bisi dalam RM200 juta ti deka digaga chara berenggat,” ku Adenan.
Iya madah munyi nya lebuh bejadika Komplek Opis Perintah Menua, Palan Konferens Serian, sereta Pasar Baru Serian di Dewan SJK ( C) Chung Hua ditu, kemari.
Ba atur pengawa nya mega, Adenan lalu nyuaka geran ngagai SJK Chung Hua Serian RM100,000, ngambika bisi dikena sekula nya ngemansangka sekula sida.
Kelimpah ari nya, Adenan mega lalu nyuaka urung 44 iti Setipikit Mangku Pengawa nyadi Temenggung/Ketuai Pupu Bansa/Kapitan ke Bagi Menua Serian 2016 nyengkaum nyuaka Pala Tanah sereta etipikit Terima Kasih ngagai raban orang ti udah nyuaka bantu.
Ba atur pengawa nya mega, Adenan ngarapka mensia mayuh ke diau di Bagi Menua nya terus nyukung Barisan Nasional (BN) baruh pegai Adenan, tauka di sebut iya ‘Tim Adenan’.
“Aku ngarapka kita semua deka meri kami peluang lima taun agi…Dua taun aja enda chukup.
“Enti kita meri kami mandat ke besai, aku deka bejaku ngarika kita di Kuala Lumpur,” ku iya.
Ba Pengawa Bepilih Besai Kunsil Nengeri Ke-11 (PRN ke-11) sekali tu ku iya, bisi 11 iti kerusi/sitak baru nambah ari 71 kerusi ke dikembuan Sarawak ngelama tu, ti ngujungka semua penyampau kerusi nya nyadi 82 kerusi, ku iya.
“Ari 11 iti kerusi/sitak baru nya, 2 iti kerusi baru diungkupka bansa Bidayuh, lalu ngujungka semua kerusi di sitak Bidayuh bisi 8 iti kerusi (2 iti kerusi baru, lalu 6 iti agi kerusi di sitak baka selama tu),” ku iya.
Kelimpah ari nya iya madah, dalam kandang dua taun udah mangku pengawa nyadi Kepala Menteri, urung 50 pemutus udah digaga iya ke mungkur minta kuasa autonomi diberi pulai baru ngagai Sarawak nitihka Sempekat Malaysia, Royalti Minyak 20 peratus agi ti benung diperundingka, pom opis perintah nadai agi ngena bansa ‘lain-lain’, sereta mayuh agi pemutus bukai ke meri penguntung ngagai Sarawak ti deka dipejalaika.-Borneo Post
Post a Comment