SIBU: Chalun Parti Demokratik Progresif Sarawak (SPDP) ke ngelakuka diri ungkup penuduk DUN Pakan Tedong Gunda nguna awak pengerami Taun Baru China (TBC) ngabang ngagai rumah ketuai bansa China di Pakan.
Sama nyempulang pejalai iya Kaban Parlimen Julau Datuk Joseph Salang Gandum sereta chalun SPDP ke ngelakuka diri ungkup penuduk DUN Meluan, Belayong Jampong.
Tedong maya dirandau madah pengawa bansa nya endang awak ke chukup manah dikena besilih penemu enggau pangan diri.
“Maya kami berandau enggau pangan diri, dia kami bekunsi penemu kelebih sentang mutarka isu ke ditapi raban bansa China di Pakan.
“Randau kami nyadi agi laban ke digulu Salang ke mega nyadi pengari rayat Barisan Nasional (BN),” ku iya.
Kenu ku Tedong, iya udah bejalai semua pengawa lalu diatu semina nganti hari nganjung nama chalun.
Iya madah, bisi sekeda rumah panjai di Pakan sampau tiga kali udah diabas iya dikena ngulihka sukung.
“Ari penemuai baka nya, mayuh isu ke ditapi rayat di DUN Pakan kelebih agi ba raban nembiak.”
“Tebal agi nembiak di DUN Pakan nyau belelang, ketegal ti deka ngiga pengawa ke lebih manah,” ku tandu iya.
Nya alai, iya ngarapka maya Pengawa Bepilih Besai Nengeri (PRN) tu ila rayat ulih nyukung iya ngambika ulih gawa ke rayat.
“Enti semina deka ngulih pangkat, aku ngasaika nama dikemisi diatu udah chukup ungkup kami sebilik.
“Tang kitai enda ulih ngerunding diri empu aja, laban agi mayuh rayat Pakan beguna bantu baka nyungkak penatai pemisi sida,” ku tandu iya.
Nerang silik, Tedong madah rayat di DUN Pakan agi jauh tinggal ari sukut pemansang infranstruktur.
Iya madah, penatai pemisi rama rayat Pakan tusah deka dikemansang enti nyema nadai jalai raya. Pia mega, perengka bukai baka bekal ai beresi enggau karan.
Bepelasarka rikod, sitak DUN Pakan ngembuan 9,923 iku pengundi ke udah berejista.-Borneo Post
Post a Comment