KUCHING: Perintah nengeri udah nerima agih belanja sepenyampau RM10 juta ungkup taun 2016 ari perintah besai, dikena bejalaika Skim Duit Jali Rumah Panjai Sarawak.
Ketuai Sekretari Perbendaharaan, Tan Sri Dr. Mohd Irwan Serigar Abdullah madah, skim nya dikena mantu raban kurang penatai pemisi kelebih agi peranak menua pesisir Sarawak ngambika ngembuan sereta diau ba rumah ti lantang.
“Perintah besai udah setuju ngemanjaika Skim Duit Jali Rumah Panjai Sarawak lalu nyendiaka belanja sepenyampau RM10 juta ungkup taun 2016.
“Tuju skim tu dikena mantu pengempu rumah ke enda ulih nginjau duit ari bank dikena ngaga,nyeruri tauka ngemanah rumah panjai.
“Lalu penyampau ke ulih diinjau iya nya nyentuk RM15,000 ungku sepintu (rumah panjai),” ku Irwan dalam aum pengarang berita, kemari.
Dulu ari nya Irwan ngarika perintah besai nyuaka replika chek RM10 juta ngagai perintah nengeri ti diarika Sekretari Perintah Nengeri, Tan Sri Datuk Amar Mohamad Morshidi Abdul Ghani.
Perintah Besai udah nyendiaka ungkup belanja ngagai ‘Kumpulan Wang Amanah Pinjaman Perumahan’ ngagai Raban ke Penatai Pemisi Mit di Negeri Sarawak ti diatur Perintah Nengeri Sarawak nengah Perbadanan Pembangunan Perumahan Sarawak (HDC) berengkah ari taun 2006.
“Nyentuk taun 2015, Perintah Besai udah ngungkupka RM72.7 juta ngagai Perintah Nengeri Sarawak dikena bejalaika skim tu,” ku Irwan.
Dalam aum pengarang berita ke sama, Morshidi madahka skim nya diungkup ngagai raban ti kurang penatai pemisi sereta ulih mayar pulai baru duit injau nya.
“Dikena mantu raban seranta sida ke direjista nengah e-kasih endang bisi bantu khas iya nya nengah ‘Program Bantuan Rumah’ nengah Opis Menteri Pemansang Menua Pesisir enggau Mengeri.
“Kitai nyukung semua program ke dipejalaika Perintah Besai laban tu manah amat sereta mantu rayat kitai,” ku iya.
Kelimpah ari nya, Irwan madahka ba penemuai ke nengeri tu iya deka bejalaika pengawa ngabas Palan Transformesyen Bandar (UTC) enggau Palan Tranformesyen Menua Pesisir (RTC) di nengeri tu.
“Nyerumba penemuai ke Sarawak aku deka ngabas dua iti agi UTC di Sarawak iya nya di Sibu enggau Miri ti digaga ngena ungkus belanja RM30 juta ke tiap UTC nya.
“UTC nya deka tembu ujung bulan Februari lalu berengkah beoperasyen pun bulan Mac sereta deka dipenyadika Menteri Besai lebuh iya nemuai ke nengeri tu ila.
Perintah mega bisi ngaga sebuah RTC di Betong ti beungkus RM5 juta ke tembu ujung bulan tu, kitai arapka RTC tu deka chakah nyendiaka servis ngagai peranak menua pesisir ngelingi Betong,” ku Irwan.-Borneo Post
Post a Comment