KANOWIT: Allan Siden Gramong ke udah dichiri nyadi chalun Parti Pesaka Bumiputera Bersatu (PBB) bediri ba sitak Kunsil Nengeri (DUN) Machan maya Pengawa Bepilih Nengeri (PRN) ti deka datai agi randaka lalau sereta embing ari semua piak.
Pekara tu dibantaika apai iya, Kaban Kunsil Nengeri (ADUN) Machan Datuk Gramong Juna maya Panggau Pemerindang Taun Baru China 2016 di Pasar Kanowit, lemai kilah ensana.
Ku iya, Allan agi biak ba pengawa politik lalu ngarapka semua pengundi ba DUN nya ulih nerima Allan ti nganti penuduk iya.
“Ngarapka rayat ulih nyukung sereta nyaup iya lalu anang sanggu ngajar iya.
“Aku berasai temegah amat ati laban iya (Allan) enda belampung ati deka nampung pengawa aku ngemansangka rayat ditu,” pia ku iya madah.
Bela bisi datai maya tu iya nya Dato Catherine Gramong, Pemesai Opis Pelilih Kanowit Katis Noel Nyabong, Allan, Ketuai Opis Pemadah Donny Minggu Ling, Penghulu Thomas Ling enggau Ketuai Raban Nembiak PBB Machan Brendan Ulok.
Pengerami nya diatur Raban Nembiak PBB Machan, Opis Pemadah Kanowit enggau Komuniti China Kanowit.
Gramong ti mega Menteri Muda Dagang Temuai enggau Pemansang Tanah madahka endang udah maya iya alai iya nyurut ke diri ari pengawa politik lalu meri awak ngagai Allan nandu pengawa iya.
“Aku udah nyadi pengari rayat ditu ba pengelama semilan penggal.
“Aku ngasaika udah chukup maya alai aku belelak.
“Terima kasih ngagai sukung rayat ditu kelimpah bala kaban sama parti ngagai aku ngelama tu,” ku iya madahka baru.
Ku Gramong, sekumbang ke nyadi pengari rayat dia, iya berasai lantang bejalaika pengawa ngaduka pemansang ngagai rayat dia.
“Kebendar iya, aku agi deka megai tanggungpengawa tu tang umur udah majak tuai,” pia ku iya.
Bekenangka pemansang ba pasar Kanowit, iya madah, pasar nya diatu udah mayuh insur ari pekara pemansang enti dibida enggau 30 taun sebedau tu.
Ketegal nya, iya ngarapka Allan ulih ngemansangka agi pasar nya nyema bisi sukung ke manah ari rayat empu.
“Tu endang pengawa Barisan Nasional (BN), ngangkatka pemansang menua.
“Ngarapka udah tu, Kanowit majak mansang bepun ari pegai BN,” ku iya madah.
Ba pengawa tu, Gramong mega dipebasa nyuaka chek geran menua pesisir (MRP) ngagai tokong China, sepital enggau gerempung ukai dikuasa perintah (NGO).-Borneo Post
Post a Comment