Ketuai komuniti di Bau nyukung Nansian bediri ngetanka sitak Tasik Biru

BAU: Raban ketuai komuniti di Tasik Biru meri sukung nadai bebagi ngagai penyandang Datuk Peter Nansian ngetanka penuduk nya rambau Pengawa Bepilih Nengeri (PRN) ti deka datai tu.

Semua raban Penghulu, ngarika raban bansa Melayu enggau China, sereta raban sub-etnik Singgai, Jagoi enggau Bratak Bidayuh di kandang menua nya, bela bekunsi penemu ke sama pasal Nansian udah mayuh mai pemansang ngagai kandang menua nya, sereta agi dikeandal nyadi chalun ke ulih menang.

Penerang tu dibantaika raban ketuai komuniti iya ke bisi bejaku rambau pengerami makai lemai ti diatur Kelab Raban Ketuai Komuniti Bidayuh Pelilih Bau bepalan ba Palan Sivik Bau kena Hari Lima minggu nyin tadi.

Sama bisi datai rambau pengerami tu iya nya ketuai komuniti Bidayuh Pelilih Mit Bau, Pemancha Daniel Teho.

Pengerami makai lemai nya mega bisi digulu raban Komiti Pemansang enggau Pengelikun Genturung Pendiau (JKKK) ari sekeda tumpuk pendiau di sitak menua nya diatur beserimbai enggau Pengerami Taun Baru China.

Ku Daniel, Nansian tu ngembuan peneleba enggau juluk nyadi ketuai ke seruran ngemeratka pengawa pemansang di Bau sereta mega tumpuk pendiau.

Ku iya, Nansian balat ngemeratka pengawa pemansang ba pekara pelajar lalu udah suah meri licha peransang ngagai bala nembiak sekula ba mayuh bengkah pengerami.

Nansian tu mega chukup ngemeratka pekara enggau pemansang pemanah ulah raban bansa peranak menua nya, nyungkak pemanah palan endur pengawa jalai pengarap baka kuil, surau, chapel enggau gerija.

“Tambah mega, Nansian mega mai pemansang infrastruktur ngagai tumpuk pendiau ba kandang menua nya baka bekal ai enggau elekterik sereta melakin jalai tama nuju genturung pendiau,” ku iya.

Tandu iya, pengawa ngaga Sekula Sekondari (SMK) Singgai nya sekeda ari pengawa pemansang ti dipejalaika Nansian.

Daniel mega madahka peranak Tasik Biru benasit amat ngembuan pengari rayat ke nyadi menteri muda sereta Nansian tu seiku chalun ke agi ulih menang.-Borneo Post