SIBU: Kandang menua pesisir ba Kunsil Nengeri (DUN) Dudong enda kala ditinggal ari pemansang taja pan penuduk nya dipegai penyakal.
Sekretari Politik Kepala Menteri Maurice Giri madah, perintah semampai ransing mai pemansang ngagai menua pesisir nyengkaum rumah panjai di Dudong.
“Sehari tu aku bisi nemuai ngagai sxekeda kandang endur di Dudong baka sekula, Rumah Gundi enggau Rumah Penghulu Philip Kayak ketegal deka semak agi meda nama bagi peminta rayat baka bekal ai enggau karan.
“Udah ke nemuai, aku ngasaika sekeda bengkah projek patut digaga ngambika rayat ulih ngasaika pengelantang,” pia ku iya madah ngagai pengarang berita, kemari.
Maurice madah, iya udah diasuh perintah nengeri datai meda kediri nama bagi projek ke patut di gaga di Dudong baka di rumah panjai.
Ngenang pasal projek jematan baru di Rumah Philip, Sungai Durin, iya ngarapka opis ti bekaul ulih ngaduka pengawa ti patut.
Ku iya, perambu ngaga projek nya udah dibantai tang empai bisi pengawa nangkan ke nya udah digaga.
“Jematan nya udah lama lalu tau ngeruga mensia mayuh ke nengah jematan nya ninting hari.
“Nya alai, projek nya patut digaga enggau lengkas kelimpah aku empu deka mantaika pekara tu ngagai Kepala Menteri,” ku iya nerang.
Rumah Philip bisi 120 pintu tauka 700 iku peranak endang nengah jematan nya ninting hari.
Kelimpah sida serumah jematan nya mega dikena bala ari Rumah Nari.
Maurice madah, Kepala Menteri endang semampai ngemeratka pemansang di menua pesisir.
Berindik ari pekara nya ku iya, iya deka enggau lengkas mai pekara bekaul enggau projek jematan nya ngagai Kepala Menteri.
“Nambahka rayat ditu endang penyukung Barisan Nasional lalu patut perintah ngaduka pemansang ke sida ditu,” ku Maurice madah baru.
Bela bisi datai nyambut penatai iya maya tu iya nya Penghulu Philip Kayak.-Borneo Post
Post a Comment