KUCHING: Chalun indu ari Parti Pesaka Bumiputera Bersatu (PBB) ti deka dipilih ngetanka sekeda penuduk Kunsil Nengeri (DUN) di nengeri tu nyerumba Pengawa Bepilih Besai Nengeri (PRN), endang ukai chalun ke sengapa laban sida dikeandal ulih menang.
Menteri Orang Indu, Ruang bilik enggau Pemansang Raban Bansa ti mega nyadi Kaban Parlimen (MP) ke sitak Batang Lupar, Datuk Seri Rohani Abd Karim madah iya sigi ngarapka chalun indu ari PBB bisi nambah.
“Ukai semina nyadi chalun aja, tang ulih menang,” ku Rohani.
Rohani ti mega nyadi Mandal Presiden PBB Sayap Indu madahka sentang haribulan PRN 11, ba penemu iya, Kepala Menteri sereta Menteri Besai sigi udah nemu maya ke patut endur ngatur PRN 11.
Ba penyendia indu PBB maya PRN 11 tu ila, iya madah:
“Diatu, pelaba aku semina ngatur utai ke mit-mit aja, chalun baru sereta sitak ke baru ke dijangka deka alai PBB bediri.
“Kepala Menteri enggau Menteri Besai endang udah nemu maya ke patut deka ngatur PRN 11. Tang ba chalun ari PBB, sigi chalun ke ulih menang sereta pemadu nyulut,” ku iya lalu nandu baru, ba pemansang menua, lelaki enggau indu nengeri tu ke bela ngemansangka nengeri tu.
Serak tu (PRN 11), Rohani madah dijangka nyangka bisi dua iku chalun indu ari PBB deka bediri.
“Sigi mayuh chalun ke bepeluang ulih bediri ari Nembiak, Indu, Apai…Semua bisi penau, tang pelaba aku Kepala Menteri sereta Menteri Besai deka ngemutarka semua pekara tu, tambah mega Kepala Menteri endang mayuh peneleba pasal pekara ty,” ku iya lalu ngasuh pemberita besabar laban Kepala Menteri empu deka madah pasal rintai chalun PBB ngagai pemberita enda lama agi.
Sebedau tu, maya aum PBB pampang Satok ti diatur di Santubong bedau lama tu tadi, Adenan bisi madahka hari nganjung nama nyangka deka digaga kena 19 March lalu hari muai undi dipelaba kena 30 April.
Taja pia, kededua haribulan tu bedau ditetapka Komiti Pengawa Bepilih Besai (SPR).
Sebedau tu penyampau penuduk di nengeri tu ke semina 71 nambah ngagai 82 buah.
Ba randau nya mega, Rohani madahka bedau lama tu tadi, sebuah Rang Undang-undang pasal anak mit di menua tu udah digaga.
“Rang Undang-undang Kanak-kanak seiti ari atur undang-undang ke berat ngambika bala anak mit di menua tu, sama dijaga nitihka pematut,” ku iya seraya madah Rang Undang-undang Kanak-kanak Pindaan 2015, udah dibacha keterubah iya di parlimen lalu bulan March tu ila, iya deka dipejurai sebedau dikemendarka.
(Undang-undang tu udah diubah, udah dibai ngagai parlimen, udah dibacha ungkup keterubah, tang bedau dikemendar,” ku Rohani.-Utusan Borneo
Post a Comment