KUCHING: Ex-Sekretari Politik Opis Kepala Menteri Nelson Kloni sereta penganalisis politik Datuk Peter Minos meri respon ke manah ba sentang pengawa perintah ti udah meri surat pala tanah ngagai anah Adat Bansa Asal (NCR) ungkup menua Ulu Rimbas enggau Ulu Paku.
Kloni dalam teks iya nengah ‘whatsapp’ madah, pengawa meri pala tanah ngagai tanah NCR sigi dikemerat sereta dianti pengempu tanah asal di serata menua Sarawak, laban pala tanah nya siti dokumen ke beguna amat ti mandangka sida bisi hak ba tanah nya ke tau dikena sida iya jemah ila, kelimpah ari mutar penyarut pasal tanah.
“Terima kasih ngagai Kaban Parlimen (MP) Betong, Datuk Amar Douglas Uggah ti madahka tanah di Ulu Paku enggau Ulu Rimbas udah disukat nengah Seksyen 18 nitihka Kod Tanah sereta dikelai ngambika orang ti ngempu tanah NCR bulih pala tanah,” ku Kloni.
Iya madah munyi tu lebuh nimbal surat berita ti dieluar kena Hari Satu tu tadi, ke alai Menteri Industri Kebun Bedandang Besai enggau Komoditi Datuk Amar Douglas Uggah bisi madahka Tanah NCR ba kandang menua (Ulu Paku enggau Ulu Rimbas) udah diaku nengah pengawa beri surat pala tanah.
Ba pekara ke sebaka nya mega, penganalisis politik Datuk Peter Minos madahka pemisi pala tanah kelebih agi dokumen tanah NCR nya beguna amat dikena nyaga tanah orang ke ngempu tanah NCR ari betapi enggau mayuh penyarut.
“Pemeri pala tanah ungkup tanah NCR ulih mutarka penyarut ba komuniti, laban dokumen tu ngenetapka hak orang ti ngempu tanah NCR nya,” ku iya.
Peter ti mega siku veteran Parti Pesaka Bumiputera Bersatu (PBB) seretaTuai Kunsil Opis Pelilih Menua Kota Samarahan madah, tanah NCR mega ulih dikemansang enggau manah nengah chara komersial taja pan iya ukai pekara ke muntang, ku iya.
“Kitai beterima kasih ngagai ketuai pemesai Dayak, orang baka Datuk Amar (Uggah) ke mai pemansang meri pala tanah sereta pemansang komersial ngagai tanah NCR.
“Tu chara ke manah mantu Dayak di menua pesisir, ukai chara baka penyakal ti bemabi ulih mantaika pengelemi rayat sereta besalahka mensia mayuh ti diau di menua pesisir, laban sida ngumbai orang di menua pesisir enda nemu pasal pekara tu,” ku iya.
Kena Hari Enam minggu nyin tadi, lebuh Uggah nemuai seraya bejadika pengerami Penumbuh ke-15 Rumah Panjai Bangkit Rembai Baru sereta bejadika Gerempung Indu di rumah panjai nya, iya madahka Tanah NCR ba kandang menua Ulu Rimbas enggau Ulu Paku di Spaoh, Betong udah diaku Perintah.-Borneo Post
Post a Comment
EmoticonClick to see the code!
To insert emoticon you must added at least one space before the code.