BINTULU: Parti Demokratik Progresif Sarawak (SPDP) bisi ati deka menggi penuduk Kunsil Nengeri (DUN) N70 Samalaju ungkup Pengawa Bepilih Besai Nengeri (PRN) ke deka datai.
Samalaju sebengkah ari sitak Kunsil Nengeri (DUN) baru ke ditumbuhka Komiti Pengawa Bepilih Besai (SPR) pengudah pengawa magi baru adan DUN Sarawak.
Kaban Kaunsil Tinggi SPDP Kaunselor Sebastian Janting Takin madah, pemutus nya deka dilempaika ngagai Chairman Barisan Nasional (BN) negeri yang juga Ketua Menteri, Datuk Patinggi Tan Sri Adenan Satem.
Iya madah, nyema Tan Sri Adenan ngengkahka chalun bukai ari parti nya, sida endang tetap nyukung dikena nentuka pemujur BN maya PRN tu ila.
Taja pia, ku iya piak sida ngarapka ketuai BN nengeri ulih ngungkupka sida penuduk nya.
“SPDP udah lama bejalaika pengawa ba sitak nya dibagi ari DUN Kidurong sereta udah lama dijaga Kaban Parlimen Bintulu, Datuk Seri Tiong King Sing,” ku iya bejaku ba sebengkah aum pemberita pengudah berandau enggau 44 iku tuai rumah enggau ketuai raban bansa ari Samalaju, apin lama ke udah.
Iya madah, kebuah minta penuduk nya laban beratika pengawa ke udah dipejalaika ngagai rayat pengelama 17 taun ke udah lalu penyampau kaban SPDP ditu manggai 6,000 iku.
Kelimpah nya, ku iya SPDP deka ngetanka kerusi ke endang dipenggi parti tu iya nya ba lapan penuduk DUN nyengkaum Tasik Biru, Meluan, Pakan, Krian, Marudi, Batu Danau, Bekenu enggau Ba’ Kelalan.-Borneo Post
Post a Comment
EmoticonClick to see the code!
To insert emoticon you must added at least one space before the code.