KUCHING: Gempuru Bersih 4 Kuching ti diketu tumu ari perambu asal mandangka bisi orang enggai meda program nya diguna sekeda raban bukai ke penguntung sida, ku Menteri Pemansang Tanah Tan Sri Dr James Masing.
“Munyi ku aku dulu ari tu, aku ulih nerima tuju gempuru Sarawak 4 Sarawakians (S4S) tang ukai Bersih,” ku iya.
Masing ke mega Presiden Parti Rakyat Sarawak (PRS) mansutka jaku tu lebuh dipinta ngenang pejalai gempuru nya ti enda datai ba pengujung.
Bersih 4 Kuching nitihka permit ke diberi polis diekemedar berengkah 29 Ogos lalu semua program ti udah ditusun patut diketu sebedau tengah malam 31 Ogos.
Tang Chairman Komiti Bersih 4 Kuching, Nicholas Mujah netapka pemutus ke alai gempuru diketu tumu ari perambu iya nya kena pagi 30 Ogos ketegal penanggul teknikal.
Nicholas enggau raban komiti bukai ngaga ripot polis urung pukul 1.00 ngalihari madah, Bersih 4 diketu.
Masing madah, ulah Menteri Besai ke dulu suba, Tun Dr Mahathir ti ngulu Bersih 4 di Kuala Lumpur ngujungka gempuru nya majak enda engkeman.
“Perundingka kitai gaya atur pengawa bepilih di Sabah suba… sekalika nya beresi..?? Sapa ke ngasuh enda beresi..? Semua nya dikereja Tun Mahathir maya iya nyadi Menteri Besai suba. Diatu iya deka dipeda nyemaka ‘Snow White’,” ku Masing.
Ngenang kaul ke sama, Menteri Muda Pemansang Nembiak Datuk Abdul Karim Hamzah madah ulah DAP ti beambi ulih ari Bersih 4 Kuching udah ngujungka gempuru lari ari tuju asal.
Ku iya tuju gempuru iya nya minta perintah bejalaika tusun merintah ti beresi enggau lurus lalu ukai enggau tuju bejaika perintah baka dikedeka DAP.
Ba pun gempuru ke diatur di Padang Song Keng Hai nya, raban DAP ti betuaika chairman Chong Chieng Jen bejalai bebala mayuh ari Hotel Hilton seraya manjung nyebut ‘Turun Najib’ ngena pemesai bunyi.
Sekeda ketuai DAP mega udah nguna gempuru nya endur sida ngenataika licha politik ngagai mensia mayuh.
Taja pia, Nicholas mengkang madah Bersih diketu tumu ukai ketegal ulah raban ketuai DAP enggau penyukung sida ti udah ngelanggar penetap gempuru.
Nicholas madah gempuru diketu ketegal penanggul teknikal enggau pengelikun mensia mayuh ke datai.-Utusan Borneo
Post a Comment