BELURU: Presiden Parti Tenaga Rakyat Sarawak (TERAS) Tan Sri William Mawan Ikom ngelalau rayat ngambika nulak raban orang ke semina beambi ulih maya semak Pengawa Bepilih Kunsil Nengeri (PRN) tang sida patut nyukung ketuai ke nyengala bagas gawa ke rayat.
Iya madah, raban nya semina besemayaka penyenang enggau jaku puang lalu bebida enggau chalun ke udah penapat bejalaika pengawa sereta ngemeratka raban pengundi iya.
Mawan ke mega naydi Menteri Pemansang Rama madah, TERAS deka terus bejalaika pengawa dikena nentuka pemujur BN kelimpah nyukung rintai chalun ke dikearapka Kepala Menteri Datuk Patinggi Tan Sri Adenan Satem ulih menang.
“Pemutus pasal chalun deka digaga iya lalu nya hak Adenan ngenukuka chalun ke patut,” ku iya.
Ku Mawan, penyandang penuduk Kunsil Nengeri (DUN) Marudi, Datuk Sylvester Entri anak Muran tu endang orang ke patut bediri ngarika BN laban iya nyengala ulih menang sereta ngembuan rikod bejalaika pengawa ngagai sitak ke dipegai enggau manah.
Iya mansutka jaku nya rambau Pengerami Pemesai Begulai enggau Rayat ba Rumah Buddy, Selipin di Bakong ensana ke digulu urung 2,500 iku peranak menua nya.
Nangkan nya, Menteri Muda Rengka Rama ke mega nyadi Menteri Muda Betanam Betupi (Gerempung Orang Bumai), Datuk Sylvester Entri anak Muran madahka reti politik demokrasi tu mandat datai ari rayat lalu tu ke dititihka rayat di Marudi.
“Enti suba chukup jauh deka ngelawa menua Bakong, Tinjar tauka Rumah Panjai Teru bekenaka perau bejam-jam pengelama tang diatu iya muntang amai dilawa nengah jalai darat.”
Bekenangka tuduh sekeda tuai rumah, ku iya, iya nadai kala beserekang penemu enggau sida nya. Enti sema sida deka datai berandau, sida tetap dikelaluka iya.
Ku iya, sida tu empu ngeyauhka diri maya politik charut ba renggat akar umbi.
Iya madah, pekara bekal ai ba bagi menua Tinjar udah diputarka dalam bulan September tu tadi pengudah projek nya tejanggal. Iya mega udah ngansak agih belanja penyampau RM25 juta ungkup projek bekal ai ba kandang menua pesisir dalam Langgur Pemansang Malaysia Lumpar ke-11 (RMK-11).
Bela bisi datai iya nya bala Kaban Komiti Besai TERAS, sereta ketuai komuniti ke besemak.
Ba pengerami nya mega, Mawan bisi ngemendarka agih belanja RM100,000 ungkup Rumah Buddy kelimpah numbuhka Komiti Indu Teras ba rumah panjai nya.-Utusan Borneo
Post a Comment
EmoticonClick to see the code!
To insert emoticon you must added at least one space before the code.