MIRI: Kaban Kunsil Nengeri (ADUN) Piasau Alan Ling Sie Kiong ngutuk ulah seraban gengster ke nyamah Tuai Rumah (TR) Jambai ari Bekelit Niah ditu kena Hari Empat tu tadi.
Penerang madah, TR Jambai dijamah ketegal iya ngarika sida semenua ningkah ulah sebengkah kompeni kebun sawit dandang besai ngachau sereta ngeruga tanah Adat Bansa Asal (NCR) sida di Bekelit, Niah.
Ling ke mega Sekretari Parti Tindakan Demokratik (DAP) Sarawak dalam jaku ke bisi dibantaika iya ba mua pengarang berita ditu kena Hari Enam tu tadi, ngansak Ketuai Polis ari Indu Opis Polis Bukit Aman nyaup mutarka penangul bekaul tanah nya entara raban komuniti di Bekelit enggau raban kompeni sawit nya.
“Kami beratika raban komuniti menua tu (TR Jambai) udah lama betapi enggau petalat tanah enggau sebengkah kompeni sawit nya, enda nemu nama kebuah tau lenyau pechaya ngagai raban polis di nengeri tu, nya alai, kami minta saup raban polis ari Bukit Aman,” ku Ling.
Dalam jaku iya nya, Ling mega minta raban polis ngambi nadai ngembuan ati takut tauka bechiping maya bejalaika pansik.
Ku iya nandu, nadai seiku pan orang patut dijamah sereta ngena atur sida empu.
“Barang sapa ke salah tauka betul dalam pengawa betalatka tanah nya, iya patut diputus nitihka undang-undang lalu tejuka ngagai undang-undang negika iya,” ku iya.
Taja pia, Ling meruan minta pekara bekaul enggau tanah NCR nya bepanggai ba bau perintah nengeri tu, laban kelalu mayuh pekara bekaul enggau pengawa ngeluarka Lisin Provisional (PL) diberi ngagai kompeni sawit dipadahka ngelui ari bungkur tanah NCR lalu baka kompeni tu bisi pengelui laban PL nya disimpan sida.
“Berebak enggau nya, peranak menua pesisir ke semina bepelasarka adat enggau sejarah ke nadai diberi hak ngempu tanah ke bendar tau nyaga orang ke amat ngempu tanah nya. Tu suah ngujungka peranak menua pesisir ngena jalai diri empu ngetanka tanah, nyangka mayuh agi sida tu salah ba mata undang-undang tang ke bendar, tu mih pekara ke ditapi peranak menua pesisir,” ku Ling nambah.
Ku iya nandu, pekara bekaul enggau pengawa ngeluarka PL ngagai sebarang kompeni patut diketu enti sema bisi petalat minta pala tanah ba tanah NCR nya lalu tu dikena ngurangka kes baka ke nuntung TR Jambai.
Piak DAP ku Ling, deka mantu pejalai kes tu ngambika iya dipending sereta dikemeratka piak indu opis polis.
- Borneo Post Online
Post a Comment