Penemuai Rani Kulup nadai kaul enggau DNP

SIBU: Berita ngerimbas pending ke viral ba media rama madah, penemuai presiden Martabat Jalinan Muhibbah Malaysia (MJMM) Rani Kulup ke Kuching kemari bisi kaul enggau orang ke numbuhka sebengkah parti baru, Parti Bansa Dayak (DNP) nerima sakal ari Direktor Strategik ke mega Ketuai Penerang DNP, Michael Lingkong.

Micheal dalam jaku ke dipansutka iya ngagai raban pemberita nyakal berita nya lalu bebulaka penemu ke madah, penumbuh parti DNP tu bisi kaul enggau penemuai Rani Kulup.

“Pekara tu bula lalu Rani Kulup nya nadai kaul enggau pengawa numbuhka DNP napi Pengawa Bepilih Besai Nengeri ti Ke-11 (PRN11) tu ila sereta berita ke bisi nyadi viral di media rama nya semina berita selebubu ngapa.”

Pia mega ku Micheal, penemuai Rani Kulup ke Sarawak, lebih agi ba mengeri Kuching ditu nadai kaul enggau DNP lalu piak parti nya empu nadai nemu Rani Kulup bisi nemuai ke nengeri tu. Sida semina nemu berita nya ari viral ke bisi ayan di media rama sereta mega bechuanka berita senentang penemuai Rani ke bisi ayan di surat berita jaku English ensana.

Bekenangka senentang tebal chalun DNP bediri di sitak diaun raban bansa Dayak dalam suratkabar jaku Melayu (Utusan Borneo) 24 November tu tadi, Micheal madah, pekara tu setipak enggau manisfesto DNP empu ke ngemeratka pekara bekaul enggau pengelantang raban bansa Dayak.

Berebak enggau nya, DNP empu sigi sebengkah parti ke deka ngangkatka raban bansa Dayak ngambika pegari nama sereta jelai rita ngiring sereta ngembing singkang bansa tu mansang ke mua dalam mayuh macham bidang lebih agi mungkur pekara ngetanka tanah Adat Bansa Asal (NCR), pelajar, pengawa ba opis perintah, skolarship sereta ke bukai.

“Kitai bela udah terang senentang manisfesto DNP tu ke ngemeratka raban bansa Dayak empu, lalu nadai salah chalun parti tu bediri ba sitak ke tebal diuan bansa Dayak,” pia ku Micheal nandu.

Ngenang baru pasal penemuai Rani Kulup ke nengeri tu, sekali agi Micheal madah, piak DNP nadai kaul enggau pekara nya sereta ngarapka mensia mayuh anang ibuhka viral ke ayan di media rama.

Micheal mega minta raban nembiak sereta profesyenal bansa Dayak nyereta parti nya lalu begulai negi nirika bansa Dayak.

“Kami ditu deka mai pemaik lalu pekara ke nyata, kami ditu deka neruska agenda ketuai Dayak baka iya empu, lama udah suah enda dikeibuhka. Kami ngelaluka semua raban nembiak Dayak ari Barisan Nasional (BN) sereta mega raban parti penyakal, ngambika nyereta kami, ngemujurka egenda politik Dayak, sereta ngasuh raban komuniti tu dipebasa,” ku Micheal nandu jaku ke kala dibantaika dalam suratkabar apin lama ke udah.-Borneo Post