KUCHING: Menteri Besai Datuk Seri Mohd Najib Tun Razak netap Projek Berumah ke digaga Perbadanan Perumahan Rakyat 1Malaysia (PR1MA) di Sarawak deka nyaup nambah pengaya rayat.
Rumah PR1MA ke dijual nengah rega kurang 20 peratus ari rega makit ku Najib bela dikearap ulih nangkup pinta nyendia rumah bekualiti ngagai peranak nengeri.
“Menua kitai udah nyapai ikas menua mansang ke alai rayat ukai semina begunaka sebuah rumah ke sengapa. Rumah ke murah pan enda dikedeka mensia mayuh.
“Rayat dekaka sebuah rumah ke manah tang sida enggai meli rumah ke bengat mar. Kitai napi pemar nyendia rumah bekualiti, chukup perengka sereta besai.
“Kelimpah ari nya kitai nguji nyual rumah nengah rega ke baruh ari rega makit,” ku iya rambau bejadi Expo Rumah PR1MA@Sarawak ke diatur di Begunan DUN (Lama) ditu kemari.
Berindik enggau nya ku iya, perintah mujur nyapai juluk nya pengudah PR1MA ngenuku konsep berumah ejensi nya.
“Kitai netap rumah PR1MA dijual nengah rega 20 peratus kurang ari rega makit ke alai pengudah nyapai juluk tu, perintah mega mujur nyaup nambah pengaya rayat,” ku iya.
Ngenang kaul ke sama, iya madah kaul rat entara Perintah Besai enggau Perintah Nengeri dikearap ulih dipajak.
Ku iya, projek PR1MA di Sarawak seiti chunto ti manah ke alai Perintah Besai nyendiaka belanja dikena ngaga rumah lalu Perintah Nengeri nyendia tanah endur projek berumah,” ku iya.
PR1MA deka ngaga 8 bengkah projek berumah di Sarawak ke mungkur pengawa nyendia 9,000 buah rumah.
Lapan projek PR1MA iya nya Vista Tunku, Matang, Matang 2, Semenggoh, Petra Jaya, Bintawa di Kuching sereta seiti di Sungai Plan, Bintulu enggau Sibu.
Ba pengawa nya kemari, Najib bisi nyuaka ‘Surat Tawaran Rumah PR1MA’ ngagai empat iku orang ti udah dulu ngenataika pinta.
Bela datai Kepala Menteri Datuk Patingg Tan Sri Adenan Satem, sapit iya Datuk Patinggi Tan Sri Alfred Jabu, Menteri ba Opis Menteri Besai Dato Seri Shahidan Kassim, Menteri Pengawa Berumah Datuk Amar Abang Johari Tun Openg enggau orang bukai.-Borneo Post
Post a Comment