Balai raya enda tau dibuka ka urang ti nyakal perintah.
Notis dipasang besai-besai begedi ka parti pemangkang, enda ngemendarka urang ti enda nyukung perintah ngindik ruai rumah panjai, ngindik lantai balai raya.
Udah tentu kerja nadai beradat tu ari penyukung Barisan Nasional (BN), ari kaki-tangan YB BN, ari sida ti bekuasa baka bala tuai rumah enggau councillor.
Sida berani begagaka atur ti bechiping bakatu laban sida nerima arahan ari ketuai politik sida, lebih agi sida ti jadi YB.
Bala ketuai politik enggau YB tu meh ti ngasuh sida berani bepasangka notis ngenggaika pemangkang.
Sida enda kakang nitih arahan atasan laban pangkat sida sigi dalam genggam ketuai politik sida.
Kitai sama bela bisi macha dalam newspaper, dalam social media, dalam Internet ketuai politik BN baka Speaker Dewan Undangan Negeri Asfia Awang Nassar nangkan sida ti jadi tuai rumah, penghulu, pemancha enggau councillor dalam mesti nyukung BN.
Ku Asfia, sida tu digaji gawaka perintah, ngenatai polisi perintah serta bejadika projek pemansang perintah, enti sida nyukung pemangkang udah tentu pengawa enggau polisi perintah janggal.
Nya alai, sapa ti ditemu nyukung pemangkang deka dibuai kerja, pia ku ia.
Di dinga enggau kasar munyi ti betul utai ti disebut Asfia tu, tang enti disidi bebendar, penemu tu nadai masuk akal lalu enda ulih diterima.
Enti polisi perintah manah, enti program pemansang perintah tetap nguntung mensia mayuh, nadai kebuah rayat nyengkaum tuai rumah, penghulu, pemancha mantah perintah tauka BN.
Pemangkang lebih nemu, enti rayat kaya raja, baka urang ti nguan pasar besai, sida enda bepanggai ba BR1M, undi sida mega enda ulih dibeli sepuluh-duapuluh ringgit.
Ketegal rayat merinsa meh sida ulih dibeli BN enggau BR1M, enggau subsidi, enggau atap sing, enggau injin sangkut.
Dibanding enggau BN, BN bisi duit kena bebeli bakatu laban sida megai duit rayat, megai duit ti dicabut ari chukai, ari GST serta mega duit derma baka RM2.6 billion ti diderma urang ngagai Prime Minister Najib Razak.
Paling andal, paling gaga ati enti rayat kaya raja sigi parti pemangkang laban urang kaya raja enda ulih dibeli.
Nya alai, pemangkang enda bangat palui mantah program pemansang enti mensia mayuh tau jadi kaya raja.
Sapa enggai kaya? Sapa ka idup seranta?
Nadai mensia enggai ka pemansang. Nadai urang rumah panjai enggai ka jalai alun, api letrik enggau ai paip.
Nadai Iban enggai ka sekula, scholarship, duit fund begagaka rumah panjai baru baka terraced houses di pasar.
Bansa Dayak udah lama idup merinsa, bekayuh nengali hari, bejalai kaki bepuluh batu, betungkun pelita tiap malam, enda te-anjungka anak ngagai universiti, bebaris bejam-jam di klinik perintah laban nadai duit ngagai private doctor.
Dayak ti udah puas idup seranta bakatu enda enggai ka pemansang. Sida sigi udah lama minta dipansang.
Tang enti perintah madah semina enti Baram Dam digaga, urang rumah panjai tau jadi kaya raja, kati salah rayat mantah? Kati salah tuai rumah, penghulu enggau pemancha mantah? Kati salah pemangkang mantah?
Aram kita mulaika pengingat. Enti Baram Dam nyadi, 25 rumah panjai mesti pindah, semak 10,000 iku mensia ka tasah laban ampuh, semak 100,000 eka tanah pemakai sida deka ditengelam ai; pia mega pendam asal enggau pesaka lama baka tapak alai berantu enggau enselan tanah.
Baru-baru tu Kepala Menteri Adenan Satem udah madah projek Baram Dam digantung.
Nama kebuah? Nama penguntung atau pengerugi rayat ari Baram Dam?
Udah tentu empang tu udu agi ngerugi rayat arika nguntung, nya meh alai projektu dibatal.
Tanya kita, kati salah bala tuai rumah nyakal projektu ngelamatu?
Bah, ni gaya BN enggau bala tuai rumah ti udah dibuai kerja ketegal nyakal projek tu dalam beberapa taun ti udah?
Kati salah bala tuai rumah nyakal kompeni ti ngerampas tanah urang rumah panjai bebukaka lading sawit?
Utai ti endang patut, tuai rumah enda tau sekali-kali bepolitik. Sida lebih manah jadi urang tengah ari, enda nyukung sapa-sapa, ka ka BN tauka pemangkang.
Tuai rumah, penghulu enggau pemancha patut ngarika rayat, mansut penemu enggau peminta rakyat ngagai perintah.
Perintah, lebih agi BN, nadai patut nguna sida tu nakut rayat, ngugut rayat, nulung kompeni ngambi tanah rayat, berangkatka rumah panjai, nengelamka tanah pemakai rayat.
Enti munyi ku Asfianya, tuai rumah maya dia aritu nadai ngidup rayat tang ngidup perintah BN.
Kitai anang kelupaka adat lama, adat aki-ini kitai kelia. Tuai rumah tuai kayau, tuai gawai, manang ngubat urang sakit, urang ti bidik-lansik pandai beburung, betenung, meda nasip, meda langit, meda bintang, bejaku enggau antu, berandau enggau petara awakka pengidup kitai di rumah panjai menyana.
Nadai penyadi meh bansa Dayak enti tuai rumah nyadi antu rua, antu rangka baka ti disebut Asfia.
Enti adat udah enda diguna, dipebasa, udah nadai meh bansa.-The Ant Daily
Post a Comment