Sapit Menteri Pemansang Menua Pesisir enggau Kandang Menua Datuk Alexander Nanta Linggi, rayat ditu ukai orang ti enggai meda orang ari Semenanjung Malaysia tang sentimen rayat ditu ti deka meda peranak menua tu empu megai batang pengawa baka penuduk nyadi prinsipal nya.
“Kepala Menteri Datuk Patinggi Tan Sri Adenan Satem empu minta orang menua tu dikemeratka agi megai penuduk nya.
“Enda patut kitai ditu nadai chalun ti ulih nyadi prinsipal,” pia ku iya maya berandau enggau pengarang berita, kemari.
Ku iya madah, nyema enggai enda ustaz nyadi prinsipal dia, ustaz ke dipilih nya mega patut peranak menua tu tang ukai ari luar.
Tang kenu ku iya, isu baka tu enda patut nyadi isu ti besai ketegal ti digerini lalu dipolitik kelimpah diirit enggau isu jalai pengarap.
“Kitai ngarapka MOE sensitif mimit laban pekara tu ukai pekara ke baru kala dipetalatka.
“Pia mega anang nyengulai isu tu enggau isu jalai pengarap,” ku iya seraya ngarapka isu nya ulih diputar enggau lengkas.
Nanta ti mega Kaban Parlimen Kapit madah, rayat ditu ukai orang ti enggai meda penatai orang Semenanjung Malaysia.
Iya madah, kenyau ari suba udah mayuh bala pengajar diambi gawa ngajar ba nengeri tu nyengkaum ke ulu sungai baka di sitak Kapit.
Isu ustaz ari Kelantan ti dichiri nyadi Prinsipal di SMK Sungai Paoh nyentuk ke diatu suah dipetalat mensia mayuh nyengkaum ba laman rama.
Tebal agi enda lantang ati enggau pekara nya bepun ari jaku ke kala dibantai Adenan ti deka meda peranak nengeri tu empu megai penuduk ke besai ari ke milih orang datai.-Utusan Borneo
Post a Comment
EmoticonClick to see the code!
To insert emoticon you must added at least one space before the code.