SIBU: Seiti awak puang deka disedia ba telah bansa Dayak dalam pom rasmi perintah ngambika ulih endur nulis sereta nunjukka nama bansa diri empu ungkup penguna ke minta sesebengkah pekara.
Menteri ba Opis Menteri Besai, Datuk Joseph Entulu Belaun madah taja Dayak tu leka jaku ke besai nelah tiga raban etnik majoriti di Sarawak, penguna mega bisi pilih ngelai sekalika sida nya Iban, Bidayuh tauka Orang Ulu.
Kenu ku iya, bisi mega kes penguna ari etnik bansa bukai ke enggai dikategori di baruh tiga bengkah nama bansa nya.
“Dalam timpuh dua minggu ke deka datai, Komiti Teknikal Minoriti Bumiputera deka nganjung ripot ngagai Kabinet Perintah Besai. Tuju tu dikena nerang ngagai sida.
“Pengudah kabinet nerima penerang nya, MAMPU deka mantaika lalau ngagai perintah nengeri, kelebih agi Sarawak enggau Sabah bekaul enggau kategori ke deka dipasuk dalam pom berengkah ari diatu,” ku iya madah ngagai The Borneo Post maya ditanya pasal pemutus aum Komiti Teknikal Minoriti Bumiputera kena 29 Feb tu tadi.
Aum nya betuaika Menteri Kuasa, Teknologi Gadung enggau Ai, Datuk Seri Dr Maximus Johnny Ongkili enggau Menteri Kebun Dandang Besai enggau Komoditi, Datuk Seri Douglas Uggah.
Entulu ke mega nyadi Kaban Parlimen Selangau madah nadai sebarang ubah digaga bekaul enggau pemutus nya.
“Entara pekara ke udah diputus ungkup Sarawak iya nya pom rasmi perintah deka ayan telah Dayak ba ruang bansa kelimpah ari Melayu, China enggau India.
“Ba telah Dayak tu, deka bisi awak puang endur penguna madahka nama bansa diri empu.
Ba bulan Oktober nyin kemari, Kabinet Perintah besai udah ngemendarka telah ‘Dayak’ ti mandangka bansa Bumiputera ukai Melayu dalam pom rasmi perintah.-Utusan Borneo
Post a Comment