SARATOK: Mensia mayuh patut ngetanka penyerakup sereta seati, ke lebih agi dikena nentuka pemansang ti dikerembai perintah Barisan Nasional (BN) ulih diasaika belama.
Menteri Pemansang Rama Sarawak,Tan Sri William Ikom madah, pengelikun enggau pemansang ti diasaika diatu ukai nya mudah diulih pia aja, tang diulih nengah penyakah kelimpah ari pemintar ketuai enggau perintah BN nyengkaum sukung penuh ari rayat.
“Perintah Barisan Nasional (BN) nemu agi mayuh pekara ti deka diputar ke lebih agi bekaul enggau perengka guna rayat di nengeri lebuh nyingkang nuju Juluk 2020.
“Perintah nadai kala enda ingatka semaya ti ditabur ba rayat ngelama ti nyadika kelai pemansang di menua pesisir ke mega sebengkah agenda dalam Bidang Pemujur Besai Menua (NKRA) ti dikemeratka.”
“ Perintah nemu rayat enda ulih idup atas semaya aja,kelimpah dikeamatka baka ti ditetap dalam juluk perintah BN,nya alai kami minta rayat ngemajak sereta ngenegapka agi sukung ngagai perintah BN laban semina ketuai enggau perintah BN aja ti ulih negi sereta mai rayat nuju pemansang ke seimbang sereta manah ari semua sukut,” ku Mawan.
Iya bejaku munyi tu ba Pengerami Nutup ‘Sejiwa Senada 2016’ Saratok, ditu malam ensanus.
Ku Mawan, ngagih belanja tambah RM1 biliun ti dipadah Menteri Besai Malaysia ungkup nengeri Sarawak apin lama udah,endang manah ungkup rayat di nengeri tu.
Ku iya, diatu perintah nengeri Sarawak benung ngemeratka pemansang ungkup rayat di menua pesisir.
“Tu dikena ngemujurka juluk ati rayat di nengeri tu ngambika sama sebaka kelebih agi ari sukut pemansang enggau nengeri bukai di Semananjung Malaysia.
“Kami ngarapka nengah ripih perambu ke teatur tu ulih meri pemansang manggai ba impek ke pemadu tinggi, ke lebih agi ngagai mensia mayuh di menua pesisir,” ku Mawan.
Ngenang pasal program ‘Sejiwa Senada 2016’ Saratok, Mawan madah nya siti pemujur besai sereta besai amat reti ke lebih agi ba raban pengatur enggau mensia mayuh.
Mawan ke mega Kaban Parlimen Saratok madah, penyampau mensia mayuh ti ngulu program Sejiwa Senada 2016 Saratok ngelui 150,000 lalu mandangka chara perintah nyenyemakka diri enggau mensia mayuh nengah konsep ketuai enggau ejensi begulai enggau rayat nya mujur.
“Berebak enggau nya, Saratok Kitchen mega teulihka pemujur pengudah bulih asil urung RM500,000 sekumbang tiga hari program nya diatur di Dataran Saratok,” ku Mawan.
Program nya disukung mayuh bengkah ejensi perintah nengeri enggau perintah besai, NGO sereta kompeni peribit.
Bisi 167 buah ejensi masuk ba pengawa pemandang ti diatur semanjai program nya.
Kelimpah ari nya, Opis Pengerai Malaysia mega udah mujur bulih Gelar Palan Pemandang ke Pemadu Manah ba program Sejiwa Senada 2016 Saratok.
Kaunsil Penyerakup enggau Pengintu Tanah Sarawak (Salcra) ba penuduk kedua lalu Opis Kampung Sarawak ba penuduk ketiga.-BORNEO POST
Post a Comment