Mensia mayuh ke lebih agi kaban SDNU diperansang ngulurka bantu dikena ngelempungka penanggul ti nuntung iya
KUCHING: Sarawak Dayak National Union (SDNU) bejalaika inisiatif ngumpul bantu belanja dikena nyaup ex-pelanda 100 meter menua Watson Nyambek ti betapi enggau penanggul.
Sapit Presiden SDNU, Datuk Alexander Nanta Linggi madahka pengawa ngumpul bantu belanja nya dipejalaika dalam timpuh sebulan.
“SDNU deka mantu Watson ngelempungka penanggul iya, sama enggau gerempung ke bukai sereta aku arap endar perintah nengeri baka ti dipadahka Kepala Menteri mega deka mantu iya (Watson).
“Kami (SDNU) deka ngumpul bantu belanja nengah SDNU WATSON FUND ti dipejalaika dalam timpuh 30 hari ke berengkah sehari tu (kemari) nyentuk 9 April, lalu semua duit ke diterima dalam timpuh nya dikena mantu Watson.
“Nya alai kami meransang ke lebih agi bala kaban SDNU sereta mensia mayuh ti bisi pengasih sama ngulurka bantu ngagai Watson ti amat begunaka bantu nya,” ku iya.
Nanta mansutka pekara nya dalam aum pengarang berita pengudah ti baum enggau kaban Kaunsil Besai SDNU bekaul enggau pekara nya, ba opis iya ditu, kemari.
Entara kaban Kaunsil Besai SDNU ke enggau baum nya kemari, Tukang Wang Besai Ir. Christopher Gira Sambang, Churchill Edward Drem (Ketuai raban Nembiak), Catherine Edward (Unit Main Asal enggau Pengelantang), Datuk Paduka Dr. Anthony Nait enggau Diana Lang.
Iya madah, Watson udah nemu atur pengawa ke diatur SDNU lalu iya (Watson) meri besai terima kasih ngagai barang sapa ke meri bantu ngagai iya.
“Kami ngelaluka sesapa ke deka meri bantu belanja nengah SDNU WATSON FUND tau masukka duit ngagai akaun SDNU ba lumur 511074532500.
“Lalu dikena ngenukuka pengamat meri bantu nya, pemeri bantu patut nganjung bukti udah ngenamaka bantu belanja baka ngena whatsApp enggau chara bukai ke patut,” ku iya seraya
Nambahka nya iya ti mega Kaban Parlimen Kapit madah, nya ukai keterubah SDNU udah mantu raban bansa Dayak ti begunaka bantu.
SDNU endang suah mantu raban bansa Dayak ti begunaka bantu, lalu sehari tu kami mantu Watson, ku iya.
Nitihku Nanta kemari, SDNU deka meri bantu belanja sepenyampau RM5,000 ngagai Watson.
Barang sapa ke deka nanya pekara bekaul enggau SDNU WATSON FUND tau betelefon ngagai Ir. Christopher (012-8836959); Churchill (017-8081485); Catherine (013-8012708); Anthony (017-8075196); Diana (016-5774562) enggau Indu Opis SDNU ba lumur 082-570433.-Utusan Borneo
Post a Comment