MIRI: Parti Keadilan Rakyat (PKR) Baram ngansak tuai rumah di rumah panjai Nanga Ajoi, Tinjar minta ampun ketegal ulah iya ngemaruhka seiku ari kaban parti nya lebuh raban parti nya niki ngagai rumah panjai kena 18 Febuari tu kemari.
Sekretari PKR Baram, Dennis Along lebuh ke dirandau kemari madahka tuai rumah nya bisi meri jaku jai sereta bisi ngemedis sida sebuat maya nya kemari.
“Kami udah ngaga ripot polis di Opis Polis Long Lama beduduk ari penyadi nya laban kami minta raban polis mansik pekara bekaul enggau ulah ngemaruhka sapit chalun Marudi, Elia Bit ba rumah panjai nya.
“Diatu kami minta tuai rumah nya mansang ke mua lalu minta ampun ba mua mensia mayuh ngagai parti tu lalu ngagai orang ti udah dikemaruhka iya ke alai kami meri iya timpuh seminggu aja,” ku iya seraya madahka ulah tuai rumah nya balat ngamahka nama PKR.
Ku Dennis, enti sema tuai rumah tu enda minta ampun, sida deka bejalaika atur nengah undang-undang ngelaban iya.
“Kami balat ngemeratka pekara tu ngambika nyadi lalau sereta badu agi nyadi jemah ila. Tambah mega, pekara tu tau nyadi baru ngagai sebarang parti politik enti sema kitai enda bejalaika atur ke patut,” ku iya.
Sekeda raban ketuai besai PKR nyengkaum Chairman PKR Nengeri, Baru Bian mantah ulah tuai rumah nya lalu minta raban polis bejalaika pansik enggau lurus sereta atur ke patut ngagai tuai rumah nya.-Utusan Borneo
Post a Comment