SIBU: Isu sapa ngarika Parti Rayat Sarawak (PRS) bediri ba Kunsil Nengeri (DUN) Tamin maya Pengawa Bepilih Nengeri (PRN) ti deka datai udah chelap lalu nejuka chalun ari PRS-Barisan Nasional (BN) Christopher Gira Sambang nadai penanggul menang ba penuduk nya ila.
Chairman Raban Nembiak PRS Tamin Christopher Kusa Buan madah, diatu 80 peratus isu nya udah nadai agi ti mai reti 80 peratus mega undi rayat dia pulai ngagai PRS-BN.
“Empai lama tu tadi Presiden PRS Tan Sri Datuk Amar Dr James Jemut Masing bisi datai ngulu Pengerami Ngentak Rumah Rantai Ngelambai di Sibintek, Selangau ditu.
“Maya nya iya enggau terang madahka Gira udah dituku ngari parti bediri ba DUN Tamin.
“Ari nya, kitai berani madahka 80 peratus isu ngenggaika Gira nyadi chalun nadai agi,” pia ku iya madah ngagai pengarang berita, kemari.
Ketegal pekara tu Kusa ngarika raban iya madah ke diri andal Gira nadai penanggul nandu pemujur Datuk Joseph Mauh ngetanka penuduk nya.
Nambahka nya ku iya, naka ke diatu empai bisi parti penyakal nyengkaum Sarawak Workers Party (SWP) ngayanka diri deka bediri ba DUN Tamin ti negutka agi pengarap sida ngagai PRS mengkang ulih menang ba dia.
Iya mega madah, raban iya endang nyukung penemu Masing enggau Mauh ti udah ngaga pemutus nya ketegal Gira seiku ari chalun ke ulih menang ngarika parti nya.
Sebedau Masing empu mantaika pemutus parti nya ba Rumah Rantai Ngelambai di Sibintek, empai lama tu tadi, bisi sekeda bala raban parti di Tamin enda lantang ati laban ngenggaika Gira nyadi chalun.
Ba pekara bukai, Kusa maya tu madahka raban sida bisi ngatur ‘Majlis Jasa Mu Dikenang’ di Rumah Julia Awal, Batu 36, Tamin kena 27 Februari tu tadi.
Pengerami nya ku iya, endang diatur dikena ngenang pemanah Mauh sekumbang ke nyadi pengari rayat dia ba pengelama 25 taun ke udah.
“Pengerami tu mega dikena kitai mai bala nembiak ba DUN Tamin meri terima kasih ngagai Mauh,” pia ku iya madah.
Ku Kusa, sekeda ari program ke bisi diatur maya pengerami tu iya nya pekit Sepak Takraw, Karaoke, Sukaneka enggau Pekit Ngelinsu Nembiak Mit.
“Kelimpah ari nya, tuju kitai ngatur program tu ngambika ulih ngempung bala nembiak ditu bepekit seraya nyintal kaul enggau pangan diri, bekunsika penemu sereta ngembing sida nyeliahka diri ari ngereja pengawa ke enda menuku,” ku iya seraya meri terima kasih ngagai bala ke bisi datai maya nya lebih agi bala tuai rumah ke besemak.-BORNEO POST
Post a Comment