KUCHING: ADUN Sebuyau Julaihi Narawi nyamin sitak bepilih Sebuyau enggau Beting Maro deka nyadi kubu tegap Barisan Nasional (BN).
Ba jaku pengelalu rambau ngulu Licha Undang-Undang enggau Penyikap Napi Pengawa Bepilih Nengeri ungkup Dun Sebuyau enggau Beting Maro kemari, Julaihi madah kededua sitak nya deka begulai enggau sitak bepilih bukai meri mandat besai ngagai Kepala Menteri Datuk Patinggi Tan Sri Adenan Satem.
“Rayat deka meri sukung ke pemadu tegap ngagai Barisan Nasional (BN) ke alai Parti Pesaka Bumiputera Bersatu (PBB) deka nyadi tulang belakang BN napi Pengawa Bepilih Besai Nengeri ke-11 (PRN11),’ku iya.
Iya ke mega Menteri Muda Pemansang Menua Pesisir madah semua peranak menua pesisir deka mandangka diak sida chukup lantang sereta nyukung polisi ‘Go- Rural’ ke dituku Adenan, iya nya ngemansang kandang menua pesisir.
Ngenang kaul ke sama, ADUN Beting Maro Ghazali Gapor madah sitak ke dikuasa iya diatu udah majak tegap enti dibandingka enggau timpuh lima taun ke udah.
“Ba PRN10 suba kitai bisi berasai enda lantang ketegal menang nengah majoriti undi ke mit lalu nya nyadi ketegal sukung ari rayat ke bisi pambar.
“Kenyau ari maya nya, kitai udah bebendar ngereja pengawa, ngerapitka barisan lalu matak rayat pulai nyukung BN.
“Diatu penegap kitai udah jauh bebida ari dulu suba.
Mayuh perengka guna baka jalai alun udah disedia ungkup rayat di Beting Maro,” ku iya.-Borneo Post
Post a Comment