BAU: Parti Demokratik Progresif Sarawak (SPDP) Pampang Tasik Biru udah nyikap diri napi pengawa bepilih besai nengeri (PRN) ke diadang deka diatur enda lama agi.
Ketuai SPDP Tasik Biru, Michael Siten madahka raban parti nya diatu udah berengkah bejalaika program enggau aktiviti ba renggat pun menua sereta begulai semak enggau raban pengundi di Tasik Biru.
“Kami udah sedia deka ngambi pulai penuduk ungkup Barisan Nasional (BN). Kami udah chukup sedia napi PRN ke deka diatur sebarang maya.
“Tiga bengkah parti komponen BN di Tasik Biru mega udah besedia deka nyukung sereta nyaup sida rambau pengawa bepilih nya ila.
“Tu beduduk ari pemutus ke udah digaga sida kena 16 enggau 19 Disember taun seiti tu kemari,” ku iya pengudah chairmanka Aum SPDP Tasik Biru ditu ensana.
SPDP ngirai Chairman Yayasan John Jinep, William Jinep nyadi chalun baru bediri ba Tasik Biru, nyilih penyandang iya ke diatu, Datuk Peter Nansian.
Raban parti gempung BN ke bukai iya nya – Parti Pesaka Bumiputera Bersatu (PBB), Parti Sa’ati Rayat Sarawak Sarawak (SUPP) sereta Parti Rakyat Sarawak (PRS) udah netapka pemutus sida deka nyukung chalun BN ke dipilih SPDP rambau pengawa gempuru kena 16 enggau 19 Disember taun seiti tu kemari.
Taja Nansian menang ba penuduk nya ba baruh tiket BN-SPDP ba taun 2011 suda, diatu iya nadai agi enggau SPDP pengudah dibuai ari parti nya dalam taun 2013 suba alai parti nya ngirai nama chalun baru.
Rambau aum nya kemari, Siten madahka sida begunaka atur maya pengawa bepilih nya ila sereta minta timbal penemu ari raban parti nya dikena nambahka pemanah parti nya nyediaka diri.
Bela bisi datai rambau aum kemari iya nya, Kaban Kaunsil Besai SPDP Joing Mideh, Ketuai Nembiak SPDP Tasik Biru Paul Nohan, Ketuai Orang Indu Maria Lihim, sereta chairpersons ari pampang ke bukai.
Kepala Menteri Datuk Patinggi Tan Sri Adenan Satem dalam jaku pesan Taun Baru tadi bisi meri kelai pengawa bepilih nengeri deka diatur dalam kandang ‘tiga bulan da agi’.-Borneo Post
Post a Comment