KUCHING: Raban Serakup Dayak Sarawak (PEDAS) Miri diuluka Presiden Tetinggi, Major (B) Collin Imran disempulang Sekretari Besai PEDAS, Bill Kayong sereta raban PEDAS ke bukai bisi besaup enggau Serakup Dayak Miri (DAM) sereta Kaban Lama (KL) 2.0 ngintu pemati niang Chat Anak Ambi ke udah midang di Sepital Miri apin lama ke udah.
Nitih penerang, niang tu peranak asal ari Selulap Betong lalu nadai kala pulai ke menua asal iya kenyau ari 40 taun ke udah ngujungka kaul iya enggau kaban belayan putus. Niang tu semina gawa bekuli ngiga jereki di nengeri dikena nupi diri.
Ku Bill, ketegal penyiru ke bansa diri laban munyi ku jaku sempama – kitai mensia tu ukai ada ari bungkung kayu, nya alai raban serakup tu besaup enggau raban DAM enggau KL ngintu pemati niang nyengkaum ngiga belanja dikena meli sentubung niang sereta meli tanah pendam alai numbakka niang.
Pia mega ku Bill, sida bendar bepupuka belanja ari orang ti lurus ati ungkup pengawa nyengai niang.
Niang tu udah disengai semalam aja di rumah kaling iya di Desa Tudan.
Belalau ari penusah ke bansa tu, raban PEDAS minta semua peranak Sarawak kelebih agi raban bansa Dayak bela besaup maya betapi enggau penusah lalu anang mudah mutuska kaul enggau kaban belayan diri di menua sekalika sida udah teulihka pengidup ke menyana di mengeri tauka enda.
Kaul enggau kaban belayan, tiris pantis sereta suku sakat kitai sigi enda tau dibuai taja ulah sekeda sida nyangka bisi kala ngasuh ati kitai tekesima, tang pekara ke beguna amat iya nya penyiru sereta penyinu ati kitai enggau pangan diri patut ditanggam rat laban nya nyadi tiang pemun penegap bansa kitai.
Beduduk ari nya, Bill ngarapka semua raban bansa Dayak enda ngira sida ke agi bepegai teguh ba pengarap lama tauka udah nyadi orang Kristian bela mai niang dalam sampi sida.
“Kitai bela besampika semengat niang tu pulai ke batang mandai lalu begulai bebaik enggau semengat bala ke dulu midang taja niang enda diulit tang nadai salah kitai bebasaka pemati iya,” ku Bill.-Utusan Borneo
Post a Comment